Rossiyaning Utair aviakompaniyasi Moskva—Samarqand yo‘nalishi bo‘yicha yangi reysni yo‘lga qo‘ydi. Shuningdek, aviakompaniya Rossiya poytaxtidan Buxoro shahriga parvozlarni haftasiga uch martagacha oshirgan va Toshkentga har kunlik aviaqatnovlarini davom ettiradi.
Moskva—Samarqand reysi haftaning har seshanba va chorshanba kunlari soat 12:40 parvoz qiladi. Qaytish reyslari esa shu kunlari soat 20:20 da (mahalliy vaqt bilan).
2-iyuldan boshlab haftaning har dushanba, chorshanba va juma kunlari soat 17:30 da Moskva—Buxoro reyslari amalga oshiriladi. Qaytish reysi — seshanba, payshanba va shanba kunlari mahalliy vaqt bilan soat 01:25 da.
“O‘zbekiston — yo‘lovchilarimiz orasida ommabop yo‘nalishlardan va ularning qulayligi uchun parvozlar amalga oshiriladigan shaharlar sonini oshirdik. Hozirda Moskvadan Buxoro va Samarqandga uchyapmiz, O‘zbekiston poytaxtiga esa Moskva, Surgut va Tyumendan reyslar yo‘lga qo‘yilgan”, — deydi Utair prezidenti Oleg Semenov.
Avvalroq “Rossiya” aviakompaniyasi Moskva va Toshkent o‘rtasida to‘g‘ridan to‘g‘ri muntazam reyslarni yo‘lga qo‘yishi, Uzbekistan Airways Express Toshkentdan Samaraga parvozlarni yo‘lga qo‘ymoqchiligi, Uzbekistan Airways Sochiga aviaqatnovlarni uzaytirgani to‘g‘risida xabar berilgandi.
Izoh (0)