Тошкент шаҳрида 20 июнь куни Туризм ва маданий мерос вазирлиги ҳамда Озарбайжон Давлат туризм агентлиги ўртасида 2022 йилга мўлжалланган туризм соҳасида ҳамкорлик дастури имзоланди. Бу ҳақда Туризм ва маданий мерос агентлиги хабар қилди.
Қайд этилишича, ҳужжатни Озарбайжон президенти Илҳом Алиевнинг Ўзбекистонга давлат ташрифи доирасида Ўзбекистон бош вазири ўринбосари, туризм ва маданий мерос вазири Азиз Абдуҳакимов ва Озарбайжон Давлат туризм агентлиги раиси Фуад Нагиев имзолаган. Дастурга мувофиқ, томонлар қуйидаги йўналишларда ҳамкорлик қилади:
- Озарбайжон ва Ўзбекистоннинг йирик шаҳарларида «Ўзбекистонга саёҳат» ва «Озарбайжонга саёҳат» тарғибот тадбирларини ўтказиш;
- икки давлат ҳудудида Ўзбекистон ва Озарбайжон сайёҳлик компаниялари вакиллари иштирокида сайёҳлик ярмаркаларини ўтказиш;
- Ўзбекистон ва Озарбайжон телеканалларида икки давлатнинг сайёҳлик салоҳияти тўғрисидаги реклама материалларини жойлаштириш учун эфир вақти алмашинуви, шунингдек, Ўзбекистон ва Озарбайжоннинг машҳур телеканаллари кўрсатувларини суратга олишни ташкил этиш билан боғлиқ масалаларни ўрганиш;
- Ўзбекистоннинг туризм сектори вакиллари билан Ўзбекистон ва Озарбайжон таълим муассасалари ўртасида туризм соҳасида тажриба алмашиш;
- туризм кунларини ўтказиш (мамлакатларнинг маданияти, гастрономияси ва туризм салоҳияти тақдимоти);
- ўзбекистонлик ва озарбайжонлик саёҳатчилар учун икки давлат ҳудудлари бўйлаб янги туристик йўналишларни ишлаб чиқиш ва амалга жорий этиш.
Изоҳ (0)