O‘zbekistonda qaysi sohada ko‘proq korxona va tashkilotlar borligi ma’lum bo‘ldi

O‘zbekistonda 2022-yilning 1-iyun holatiga ko‘ra faoliyat ko‘rsatayotgan korxona va tashkilotlarning tarkibi ma’lum qilindi. 

Unga ko‘ra xizmat ko‘rsatayotgan korxona va tashkilotlar soni 366 mingdan oshiq bo‘lmoqda. 2021-yilning mos davriga nisbatan ularning soni 35,4 mingtaga ko‘paygan. 

Xizmat ko‘rsatish sohasidagi korxona va tashkilotlarning umumiy sondagi ulushi 66,1 foizga yetgan. Keyingi o‘rinlarni sanoat (16,8 foiz), qishloq xo‘jaligi (8,9 foiz) va qurilish sohasidagi (8,2 foiz) kompaniyalar egallagan. 

Xizmatlar sohasida faoliyat ko‘rsatayotgan korxona va tashkilotlar tarkibida, savdo faoliyati bilan shug‘ullanuvchi korxona va tashkilotlar yuqori ulushni egallaydi (45,9 foiz). 

Yashash va ovqatlanish bo‘yicha xizmat ko‘rsatuvchi kompaniyalarning ulushi 9,4 foizni tashkil etdi. 

Xizmatlar sohasida faoliyat ko‘rsatayotgan korxona va tashkilotlar tarkibida tashish va saqlash faoliyati bilan shug‘ullanuvchi korxona va tashkilotlarning ulushi 5,2 foizga yetdi. 

Axborot va aloqa faoliyati bilan shug‘ullanuvchi korxona va tashkilotlarning jami xizmatlar sohasida faoliyat ko‘rsatayotgan korxona va tashkilotlar tarkibidagi ulushi 3,0 foizga teng bo‘ldi. 

Sog‘liqni saqlash, shuningdek, ijtimoiy xizmatlar sohasida faoliyat ko‘rsatayotgan korxona va tashkilotlarning ulushi 3,0 foizni tashkil etdi.

Avvalroq qaysi hududlarda xizmat ko‘rsatish sohalari o‘sayotgani haqida xabar berilgan edi.