Farg‘ona, Namangan, Qoraqalpog‘iston: qaysi hududlarda xizmat ko‘rsatish sohalari o‘smoqda?

O‘zbekistonda 2022-yilning yanvar-may oylarida aholiga ko‘rsatilgan bozor xizmatlari hajmi o‘tgan yilga nisbatan 15,8 foizga oshdi. Bu haqda Davlat statistika qo‘mitasi xabar berdi.

Ko‘rsatilgan bozor xizmatlari hajmining o‘sishidagi asosiy omil — moliyaviy xizmatlar, transport xizmatlari , savdo xizmatlari o‘sgani hisoblanadi.

Yanvar-may oylarida moliyaviy xizmatlar sohasida esa Farg‘ona viloyati 74,4 foiz bilan eng yuqori o‘sishni qayd etgan.

Keyingi o‘rinlarda Buxoro (35,3 foiz), Toshkent shahri (32,3 foiz) va Samarqand (31,8 foiz) hududlarida moliyaviy xizmatlar sohasida o‘sish kuzatilgan. Eng past o‘sish Andijon (10,2 foiz) viloyatiga tegishli.

Ushbu davr mobaynida transport xizmatlari Qoraqalpog‘istonda eng yuqori darajada — 33,5 foizga o‘sib, qariyb 1,1 mlrd so‘mga yetgan.

Keyingi o‘rinlarda Namangan (14,3 foiz), Navoiy (13,4 foiz), Qashqadaryo va Surxondaryo (12,4 foiz), shuningdek, Xorazm (11,3 foiz) viloyatlarida ushbu soha bo‘yicha o‘sish kuzatilgan.

Eng past ko‘rsatkich Buxoro viloyatida qayd etilgan bo‘lib, ushbu hududda transport xizmatlari 6,1 foizga o‘sgan.

O‘tgan 5 oy mobaynida savdo xizmatlari sohasida eng katta o‘sish Namangan viloyatiga tegishli bo‘lib, unda ushbu xizmatlar 19,7 foizga o‘sgan, qiymati esa 1,9 mlrd so‘mga yetgan.

Bundan tashqari Toshkent (12,3 foiz), Navoiy va Andijon (10 foiz) hamda Surxondaryo (9,5 foiz) viloyatlarida o‘sish kuzatilgan. Eng past o‘sish Farg‘ona (0,6 foiz) viloyatida qayd etilgan.