18-iyun, shanba kuni eBay’da Uorren Baffet bilan birga ovqatlanish huquqi uchun so‘nggi kimoshdi savdosi yakunlandi. Bu haqda “Kommersant” xabar bermoqda.
Bu safar nomi hozircha noma’lum bo‘lgan g‘olib 19 mln dollardan ko‘proq pul to‘lashga rozi bo‘ldi va bu yangi rekord.
Bungacha Berkshire Hethaway rahbari bilan ovqatlanish imkoniyati uchun to‘langan eng katta summa 4,57 mln dollarni tashkil etgan.
2019-yilda kriptovalyuta tadbirkori Jastin Sun buni to‘lagan edi. Bundan tashqari, eBay’da qayd etilganidek, bu xayriya maqsadlarida saytda to‘langan rekord miqdordir.
Uorren Baffet 2000-yildan beri eBay’da xayriya auksionlarini o‘tkazib keladi. Hozirgisi ketma-ket 21-auksion bo‘ldi.
Auksionlar 2020 va 2021-yillarda COVID-19 pandemiyasi tufayli o‘tkazilmagan.
Kimoshdi savdosidan tushgan barcha daromadlar San-Fransiskoda joylashgan Glide notijorat tashkilotiga yo‘naltiriladi, u kambag‘allarga, uysizlarga va giyohvandlik bilan kurashayotganlarga yordam beradi.
2000-yildan beri Uorren Baffet xayriya kechki ovqatlari orqali tashkilot uchun 53,2 mln dollar yig‘di.
Avvalroq dunyodagi eng boy 50 kishi yarim trillion dollardan ko‘proq mablag‘ yo‘qotgani haqida xabar berilgan edi.
Izoh (0)