O‘z aktivlarini meros qilib olgan yigirmata eng boy amerikaliklar ro‘yxati tuzilib, ularning umumiy boyligi 568 mlrd dollarga baholandi. Bu haqda Forbes xabar berdi.
Birinchi o‘rinda 59,6 mlrd dollar boyligi bilan Charlz Kox turibdi. U akasi Devid bilan birga otasi Fredning Koch Industries kompaniyasini meros qilib olgan. Dastlab u neftni qayta ishlashga ixtisoslashgan bo‘lsa, keyinchalik faoliyat doirasini kengaytirgan.
Reytingda Charlz Kox bilan birinchi o‘rinni akasining bevasi — Yuliya Kox egallaydi. Devid Koch vafotidan keyin u va uning uch farzandi Koch Industries kompaniyasining 42 foizini meros qilib olgan. Yuliyaning boyligi 59,6 mlrd dollarga baholangan.
Reytingda uchinchi o‘rinni Jim Uolton egalladi, uning boyligi 58,3 mlrd dollarni tashkil etadi. U 1962-yilda otasi tomonidan yaratilgan Walmart chakana savdo tarmog‘idagi 13 foiz ulush merosxo‘ri.
To‘rtinchi o‘rinda Walmart asoschisining qizi Elis 57,5 mlrd dollar boylik bilan turibdi.U hech qachon otasining kompaniyasida yuqori lavozimlarda ishlamagan, u zotdor otlarni boqish va san’at asarlari yig‘ishni yaxshi ko‘radi.
Birinchi beshlikka Sem Uoltonning yana bir o‘g‘li Rob kiradi. 1992-yilda otasining vafotidan keyin u 20 yildan ortiq vaqt davomida Walmart kompaniyasining bosh direktori bo‘lib ishlagan va uning boyligi 57,2 mlrd dollarga teng.
Reytingda oltinchi o‘rinni Amazon asoschisi Jeff Bezos bilan ajrashganidan so‘ng milliarderlar ro‘yxatiga kirgan Makkenzi Skott egalladi. Uning boyligi 30,7 mlrd dollarga baholangan. Reytingda u boyligini meros orqali emas, balki ajralish natijasida olgan yagona shaxsdir.
Keyingi o‘rinlarda Jon Mars (29,7 mlrd dollar) va Jaklin Mars (25,1 mlrd dollar) bo‘ldi. Konfet, saqich, qandolat mahsulotlari va uy hayvonlari uchun oziq-ovqat ishlab chiqarishga ixtisoslashgan Mars kompaniyasiga 1911-yilda ularning bobosi Frenk Mars asos solgan.
Jon va Jaklin 1999-yilda otasi Forest vafotidan keyin kompaniyaning 1/3 qismini meros qilib olgan.
Ro‘yxatning to‘qqizinchi o‘rnida marhum erining qimor imperiyasining vorisi Miriam Adelson (25,1 mlrd). U Singapur va Makaodagi kazinolarni ham boshqaradigan Las-Vegas Sands kompaniyasining 52 foiz ulushiga ega.
O‘nlikni Leonard Lauder 20,7 mlrd dollar boyligi bilan yakunladi. Leonard ota-onasi Este va Jozef Lauder tomonidan asos solingan Estée Lauder kosmetika kompaniyasining 20 foiz ulushiga ega. U 30 yil davomida kompaniyaning bosh direktori bo‘lgan, hozir esa faxriy direktor lavozimini egallab turibdi.
Avvalroq dunyoning eng boy odamlari yil boshidan beri 1,4 trln dollar yo‘qotgani haqida xabar berilgandi.
Izoh (0)