Ўзбекистонда қайси соҳада кўпроқ корхона ва ташкилотлар борлиги маълум бўлди

Ўзбекистонда 2022 йилнинг 1 июнь ҳолатига кўра фаолият кўрсатаётган корхона ва ташкилотларнинг таркиби маълум қилинди. 

Унга кўра хизмат кўрсатаётган корхона ва ташкилотлар сони 366 мингдан ошиқ бўлмоқда. 2021 йилнинг мос даврига нисбатан уларнинг сони 35,4 мингтага кўпайган. 

Хизмат кўрсатиш соҳасидаги корхона ва ташкилотларнинг умумий сондаги улуши 66,1 фоизга етган. Кейинги ўринларни саноат (16,8 фоиз), қишлоқ хўжалиги (8,9 фоиз) ва қурилиш соҳасидаги (8,2 фоиз) компаниялар эгаллаган. 

Хизматлар соҳасида фаолият кўрсатаётган корхона ва ташкилотлар таркибида, савдо фаолияти билан шуғулланувчи корхона ва ташкилотлар юқори улушни эгаллайди (45,9 фоиз). 

Яшаш ва овқатланиш бўйича хизмат кўрсатувчи компанияларнинг улуши 9,4 фоизни ташкил этди. 

Хизматлар соҳасида фаолият кўрсатаётган корхона ва ташкилотлар таркибида ташиш ва сақлаш фаолияти билан шуғулланувчи корхона ва ташкилотларнинг улуши 5,2 фоизга етди. 

Ахборот ва алоқа фаолияти билан шуғулланувчи корхона ва ташкилотларнинг жами хизматлар соҳасида фаолият кўрсатаётган корхона ва ташкилотлар таркибидаги улуши 3,0 фоизга тенг бўлди. 

Соғлиқни сақлаш, шунингдек, ижтимоий хизматлар соҳасида фаолият кўрсатаётган корхона ва ташкилотларнинг улуши 3,0 фоизни ташкил этди.

Аввалроқ қайси ҳудудларда хизмат кўрсатиш соҳалари ўсаётгани ҳақида хабар берилган эди.