Ukraina huquq-tartibot organlari mamlakat rahbariyatiga qarshi qaratilgan terakt oldini olishga muvaffaq bo‘ldi. Bu haqda Ukraina ichki ishlar vaziri birinchi o‘rinbosari Yevgeniy Yenin e’lon qildi, deb yozadi Meduza.
Yeninning so‘zlariga ko‘ra, terakt tayyorlanayotgani haqidagi ma’lumot tezkor manbalardan olingan.
Vazir o‘rinbosari hech qanday tafsilotlarni e’lon qilib o‘tirmadi va “g‘alabadan keyin bu haqda ancha ko‘proq gapirish mumkin bo‘ladi”, — dedi.
Yenin qo‘lga olinganlar haqidagi ma’lumotlarni keltirib o‘tdi. Uning so‘zlariga ko‘ra, qurolli nizo boshidan buyon Ukraina Milliy politsiyasi xodimlari qo‘poruvchilik harakatlarida gumon qilib 800 dan ortiq kishini qo‘lga olgan va Ukraina xavfsizlik xizmatiga topshirgan. Shuningdek, 123 ta aksilqo‘poruvchilik guruhlari tuzilgan, bu ishlarga 1,5 ming kishi jalb etilgan.
Ukraina prezidenti ofisi vakillari aprel boshida Rossiya hujumi boshlanganidan buyon Vladimir Zelenskiyga o‘ndan ortiq marta suiqasd uyushtirishga urinishlar bo‘lganini ma’lum qilgandi. Ukraina prezidentining o‘zi Rossiya mustaqil OAVlariga bergan intervyusida: “Bizning xavfsizlik xizmatlarimiz bu masalalar bilan va bu yerga ovga keladigan muammoli unsurlarni bartaraf qilish bilan shug‘ullanmoqda”, — degan edi.
May oxirida Zelenskiy uning o‘limi yuz bergan taqdirda qo‘llaniladigan reja borligini, mamlakat bunday tang vaziyatda rahbariyatsiz qolib ketmasligini aytgandi.
Rossiya rahbariyati, shu jumladan, Rossiya prezidenti matbuot kotibi Dmitriy Peskov Ukraina prezidentiga nisbatan suiqasdlarga aloqadorlikni rad etmoqda.
Izoh (0)