Украина ҳуқуқ-тартибот органлари мамлакат раҳбариятига қарши қаратилган теракт олдини олишга муваффақ бўлди. Бу ҳақда Украина ички ишлар вазири биринчи ўринбосари Евгений Енин эълон қилди, деб ёзади Meduza.
Ениннинг сўзларига кўра, теракт тайёрланаётгани ҳақидаги маълумот тезкор манбалардан олинган.
Вазир ўринбосари ҳеч қандай тафсилотларни эълон қилиб ўтирмади ва «ғалабадан кейин бу ҳақда анча кўпроқ гапириш мумкин бўлади», — деди.
Енин қўлга олинганлар ҳақидаги маълумотларни келтириб ўтди. Унинг сўзларига кўра, қуролли низо бошидан буён Украина Миллий полицияси ходимлари қўпорувчилик ҳаракатларида гумон қилиб 800 дан ортиқ кишини қўлга олган ва Украина хавфсизлик хизматига топширган. Шунингдек, 123 та аксилқўпорувчилик гуруҳлари тузилган, бу ишларга 1,5 минг киши жалб этилган.
Украина президенти офиси вакиллари апрель бошида Россия ҳужуми бошланганидан буён Владимир Зеленскийга ўндан ортиқ марта суиқасд уюштиришга уринишлар бўлганини маълум қилганди. Украина президентининг ўзи Россия мустақил ОАВларига берган интервьюсида: «Бизнинг хавфсизлик хизматларимиз бу масалалар билан ва бу ерга овга келадиган муаммоли унсурларни бартараф қилиш билан шуғулланмоқда», — деган эди.
Май охирида Зеленский унинг ўлими юз берган тақдирда қўлланиладиган режа борлигини, мамлакат бундай танг вазиятда раҳбариятсиз қолиб кетмаслигини айтганди.
Россия раҳбарияти, шу жумладан, Россия президенти матбуот котиби Дмитрий Песков Украина президентига нисбатан суиқасдларга алоқадорликни рад этмоқда.
Изоҳ (0)