Misr va Isroil Yevropa Ittifoqiga gaz yetkazib berish hajmini oshiradi. Chorshanba kuni Qohirada tomonlar Ukrainadagi urush fonida Rossiya yonilg‘isiga qaramlikni kamaytirishga intilayotgan Yevropa Ittifoqi mamlakatlariga suyultirilgan gaz eksporti bo‘yicha kelishuv imzoladi.
Yevrokomissiya rahbari Ursula fon der Lyayyenning so‘zlariga ko‘ra, kelishuv Isroilga gazni suyultirish va dengiz orqali eksport qilish imkoniyatiga ega bo‘lgan Misr orqali Yevropaga ko‘proq gaz jo‘natish imkonini beradi.
“Ma’lumki, Rossiyaning Ukrainaga qarshi urushi Yevropa Rossiyaning qazib olinadigan yonilg‘isiga qaram ekanligini ko‘rsatdi va biz bu qaramlikdan qutulmoqchimiz. Biz ishonchli hamkorlar orqali yetkazib berishni diversifikatsiya (bozorni qayta yo‘naltirish) qilmoqchimiz, Misr esa ishonchli hamkordir”, — degan Ursula fon der Lyayyen.
O‘z navbatida Misr prezidenti Abdul Fattoh as-Sisiy hamkorlikni yuqori baholadi: “Bugungi muzokarlarda Misr va Yevropa Ittifoqi o‘rtasida energetika sohasidagi hamkorlikni kengaytirish yo‘llariga alohida e’tibor qaratildi. Kelajakda uning rivojlanishini ta’minlash uchun ushbu hayotiy muhim sohada ikki tomon o‘rtasida strategik sheriklik asoslarini yaratishga kelishib oldik”.
Seshanba kuni Rossiyaning “Gazprom” kompaniyasi “Shimoliy oqim” gaz quvuri orqali gaz yetkazib berish 40 foizga qisqarishini e’lon qilgan edi. Bunga sabab sifatida Siemens tomonidan o‘z vaqtida bajarilmagan ta’mirlash ishlari ko‘rsatilgan. Chorshanba kuni esa Gazprom “Shimoliy oqim”da yana bir gaz nasos qurilmasini to‘xtatishini e’lon qildi. Germaniyaga ushbu gaz quvuri orqali gaz yetkazish allaqachon 60 foizgacha qisqarishi mumkin.
Izoh (0)