Anqaraning Suriya shimolida maxsus operatsiya o‘tkazishi mintaqada keskinlikning kuchayishiga olib keladi. Bu haqda Rossiya prezidentining Suriya bo‘yicha maxsus vakili Aleksandr Lavrentyev jurnalistlarga aytib o‘tdi.
“Bizning fikrimizcha, bu operatsiya vaziyatni beqarorlashtirib, keskinlikni kuchaytiradigan va ushbu mamlakatdagi qurolli qarama-qarshilikning yangi bosqichiga olib keladigan bema’ni qadam bo‘ladi”, — dedi u.
Lavrentyevning so‘zlariga ko‘ra, Rossiya Nur-Sultondagi muzokaralarda turkiyalik hamkasblarini bu qadamdan tiyilishga va yuzaga kelgan xavotirlarni tomonlar o‘rtasidagi muloqot orqali hal qilishga undaydi.
Bundan tashqari, prezident vakili Suriyadagi mojaroni hal qilish Rossiya tashqi siyosatining ustuvor yo‘nalishi bo‘lib qolayotganini aytdi. “Hozir ko‘pchilik Ukrainada maxsus harbiy operatsiya o‘tkazilishi munosabati bilan Rossiyaning Suriyaga e’tibori zaiflashganini aytmoqda. Suriyani tartibga solish hali ham Rossiya tashqi siyosatining ustuvor yo‘nalishlaridan biridir. Suriya xalqiga har tomonlama yordam berishda davom etamiz”, — dedi u.
Shu bilan birga, u AQSHni ISHIDga qarshi kurash bahonasida Suriya shimoli-sharqida “talonchilik faoliyati”ni olib borayotganlikda aybladi.
Avvalroq Turkiya qurolli kuchlari va Suriya erkin armiyasi jangarilari Suriyada yangi operatsiya o‘tkazish uchun tayyorgarlik ishlarini yakunlagani ma’lum bo‘lgandi. Ayni damda armiya operatsiyani boshlash uchun Anqaraning buyrug‘ini kutmoqda. Qayd etilishicha, turk harbiylari Tel-Rifat va Manbij shaharlari atrofida jangovar pozitsiyalarni egallab, terrorchi guruhlar pozitsiyalarini o‘qqa tutmoqda.
Izoh (0)