Qurilish materiallari va qurilish sanoati milliy assotsiatsiyasi (NOPSM) va SMPRO tahliliy markazi tomonidan o‘tkazilgan tadqiqot natijalariga ko‘ra, Rossiyada barcha turdagi qurilish materiallarining yarmini ishlab chiqarish 70 foiz yoki undan ko‘proq miqdorda import qilinadigan uskunalarga bog‘liq. Bu haqda RBK nashri xabar berdi.

Tadqiqot mualliflari qurilish materiallarining 26 asosiy turini tahlil qilgan. To‘liq xorijiy uskunalarda yordamida ishlab chiqarilganlar mahsulotlar sirasiga g‘isht, plitka va keramogranit, santexnik keramika, samorez, germetika va gazbeton kiradi.

Tadqiqot natijalariga ko‘ra, Rossiyadagi qurilish kimyoviy mahsulotlari ishlab chiqaruvchilar 90 foiz, quruq aralashmalar 80 foiz, mineral izolyatsiya ishlab chiqarish esa 70 foiz import qilinadigan uskunalarga bog‘langan. Boshqa qurilish materiallarini ishlab chiqarish ham sezilarli darajada Yevropa va AQShdan import qilinadigan uskunalarga muhtoj.

Tadqiqot mualliflari va RBK bilan suhbatlashgan ekspertlarning fikriga ko‘ra, G‘arb uskunalariga yuqori darajada qaramlik joriy yildanoq sezila boshlaydi va agar hech qanday chora ko‘rilmasa, besh yildan so‘ng bozorda qurilish materiallarining keskin tanqisligi paydo bo‘ladi.

Nashrning yozishicha, Ukrainaga bostirib kirishiga javoban Rossiyaga qarshi G‘arb davlatlari tomonidan kiritilgan sanksiyalar tufayli xorijiy mashinalarni yangilash uchun butlovchi qismlar yetkazib berish, shuningdek, ularga texnik xizmat ko‘rsatish murakkablashgan. Hozirda qurilish materiallari ishlab chiqaruvchilari, boshqa chora-tadbirlar qatorida, G‘arb uskunalarini almashtirish variantlarini ko‘rib chiqyapti. NOPSM (Rossiyaning eng yirik qurilish materiallari ishlab chiqaruvchilarini birlashtiruvchi tashkilot) ularni Belarus, Eron, Hindiston va Xitoy uskunalari bilan almashtirish mumkinligiga umid qilmoqda.