AQSh Ukrainaga tarkibida kemaga qarshi Harpoon raketalari bo‘lgan yangi harbiy yordam paketini yuboradi

Harpoon kemaga qarshi raketalari 650 million dollarlik yangi harbiy yordam paketining bir qismi bo‘ladi. Pentagon rahbari Ukrainani o‘zini o‘zi himoya qilish vositalari bilan ta’minlashda qat’iyatli ekanini ma’lum qildi.

“15-iyun kuni AQSh ma’muriyati Ukrainaga qiymati 650 million dollardan ortiq bo‘lgan yana bir qurol partiyasi, jumladan, Harpoon kemaga qarshi raketalari topshirilishi haqida e’lon qiladi”, deya xabar bermoqda Bloomberg nashri vaziyatdan xabardor manbalarga tayanib.

Bloomberg manbalaridan birining so‘zlariga ko‘ra, 320 million dollar radiojihozlariga, 55 million dollar tungi ko‘rish optikasiga, 160 million dollar esa mashg‘ulotlarga sarflanadi.

Reuters axborot agentligining aniqlik kiritishicha, 650 million dollarlik paket, Ukraina xavfsizligiga ko‘maklashish tashabbusi (USAI) orqali moliyalashtiriladigan 1 milliard dollarlik qutqaruv dasturining bir qismidir. 350 million dollarlik boshqa qurollar AQSHning ortiqcha harbiy texnika zaxiralaridan yuboriladi. Ular orasida reaktiv raketa tizimlari uchun raketalar va M777 gaubitsalari uchun snaryadlar mavjud.

Avvalroq 15-iyun kuni AQSH Mudofaa vaziri Lloyd Ostin Kiyevga yordam ko‘rsatishni muvofiqlashtiruvchi g‘arbiy guruhning Bryusselda davom etayotgan tadbirida yig‘ilish ishtirokchilari “Ukrainani o‘zini himoya qilishi uchun zarur bo‘lgan vositalar bilan ta’minlash borasidagi qat’iyati tufayli to‘planganini” ma’lum qilgan edi.

Pentagon rahbari, shuningdek, Ukraina “jang maydonida burilish davrini boshdan kechirayotganini” ta’kidlagan.

“Ukrainaning o‘zini himoya qilish bo‘yicha umumiy majburiyatlar doirasida harakatni kuchaytirishimiz va Ukraina o‘zi, fuqarolari va hududini himoya qilishi uchun yanada ko‘proq harakat qilishimiz kerak”, — deydi Ostin.

May oyining oxirida Ostin Daniya Ukrainaga harbiy qurilmalar va Harpoon raketalarini yetkazib berishini e‘lon qilgandi. 9-iyun kuni Ukraina mudofaa vaziri Aleksey Reznikov raketalar allaqachon xizmatga kirganini, ular qirg‘oq mudofaasini kuchaytirganini aytdi.