NATO 20—28-iyun kunlari Turkiyada harbiy mashg‘ulotlar o‘tkazadi. Bu haqda mamlakat Mudofaa vazirligi saytida xabar berilgan.
Ma’lumotlarga ko‘ra, Ramstein Dust II-2022 (RADU II-22) mashg‘ulotlari Koniya shahridagi 3-asosiy reaktiv bazada o‘tkaziladi. Qayd etilishicha, harbiy mashg‘ulotlar Shvetsiya va Finlyandiyaning NATOga qabul qilinishi bilan bog‘liq kelishmovchiliklar fonida o‘tkazilmoqda.
Vazirlikning aniqlik kiritishicha, mashg‘ulotlarni Turkiyaning Anatolian Eagle 2022 xalqaro harbiy mashg‘ulotlari bilan birgalikda o‘tkazish rejalashtirilgan bo‘lib, u havo operatsiyalari texnikasi bo‘yicha noyob amaliyotlarni o‘rganish imkoniyatini beradi.
“Anatolian Eagle 2022 mashg‘ulotlari doirasida NATOning ‘AVAKS’ tizimi havo qo‘mondonligi va nazoratining asosiy elementlaridan biri bo‘ladi, u mashg‘ulotlar davomida oldindan radiolokatsion ogohlantirish va boshqarish, samolyotlarimiz va milliy nazorat markazlarimiz bilan birga xizmat qiladi”, — deyiladi bayonotda.
May oyi boshida Turkiya Montryo konvensiyasining Qora dengizga harbiy kemalar kiritilmasligi haqidagi nizomlari tufayli, NATOning bir qator harbiy o‘quv mashg‘ulotlarini bekor qilgan va kechiktirgan edi. 1936-yilgi Montryo konvensiyasi — Turkiyaning Qora va O‘rta Yer dengizlaridagi Bosfor va Dardanella bo‘g‘ozlari ustidan suverenitetini tiklagan hujjat. Konvensiyaning 19-moddasiga muvofiq, Turkiya qatnashmayotgan urush vaqtida nizo tomonlarining harbiy kemalari bo‘g‘ozlar orqali o‘ta olmaydi.
Bo‘g‘ozlarni yopish haqidagi iltimos bilan Kiyev Turkiyaga 24-fevral, Ukrainada harbiy harakatlar boshlangan kuni murojaat qilgan edi. Keyinroq Ukraina prezidenti Vladimir Zelenskiy Turkiya prezidenti Rajab Toyyib Erdo‘g‘onga minnatdorlik bildirgan.
O‘tgan oyda Shvetsiya va Finlyandiya NATOga a’zo bo‘lish uchun ariza topshirgan. Bu davlatlar rasmiylarining qarori Ukrainada Rossiya bosqini boshlanganidan keyin xavfsizlik sohasidagi o‘zgarishlar bilan izohlangan.
Izoh (0)