Qozog‘istonning asosiy qonuniga o‘zgartirishlar kiritish bo‘yicha referendum natijalari mamlakat tarixidagi burilish lahzasi bo‘lib, u yangi davlat qurishni boshlash imkonini beradi. Bu haqda Qozog‘iston prezidenti Qosim-Jo‘mart To‘qayev Saudiya Arabistoni tashqi ishlar vaziri bilan uchrashuvda aytib o‘tdi.
“Davlat rahbari qirollik tashqi ishlar bo‘limi rahbarini samimiy qutlar ekan, uning tashrifi mamlakatimiz tarixidagi burilish davri — umumxalq referendumi o‘tkazilgan vaqtga to‘g‘ri kelganini, referendum natijalari yangi Qozog‘istonda bunyodkorlik ishlarini boshlashimizga imkon berishini ta’kidladi” — deyiladi prezident matbuot xizmati xabarida.
5-iyun kuni Qozog‘istonda konstitutsiyaga o‘zgartirishlar kiritish bo‘yicha referendum bo‘lib o‘tdi. Asosiy o‘zgartirishlardan biri konstitutsiyadan respublikaning birinchi prezidenti Nursulton Nazarboyevga bag‘ishlangan moddaning chiqarib tashlanishi bo‘ldi. Tuzatishlar qabul qilinsa, u shaxsiy imtiyozlarining katta qismi va elboshi (millat yetakchisi) maqomini yo‘qotadi. Kelajakda uning huquqiy maqomi sobiq prezidentlar haqidagi amaldagi qoida bilan tartibga solinadi. Tuzatishlarda amaldagi davlat rahbarining vakolatlarini qisqartirish va uning yaqin qarindoshlariga davlat xizmatchisi lavozimlarini egallashni taqiqlash ham nazarda tutilgan.
Qozog‘iston Markaziy saylov komissiyasining dastlabki ma’lumotlariga ko‘ra, asosiy qonunga kiritilgan o‘zgartirishlarni 77,18 foiz kishi qo‘llab-quvvatlagan. 11 734 642 potensial saylovchilardan 7 986 293 nafari ovoz berib, saylovchilarning ishtiroki 68,06 foizini tashkil qilgan. Rasmiylar referendumni haqiqiy deb tan oldi.
Izoh (0)