MDHda Ikkinchi Jahon urushi tarixi bo‘yicha yagona darslik tayyorlanishi mumkin

Mustaqil Davlatlar Hamdo‘stligi (MDH) mamlakatlari uchun AQSH tomonidan moliyalashtiriluvchi darsliklar va o‘quv kurslarida Sobiq Ittifoq tarixi noto‘g‘ri talqin qilinadi, dedi Rossiya Xavfsizlik kengashi kotibi o‘rinbosari Rashid Nurgaliyev. Sovet xalqining fashizm bilan kurashdagi jasoratini badnom qilishga urinishlarga yo‘l qo‘ymaslik uchun MDH mamlakatlari Ikkinchi Jahon urushi tarixi bo‘yicha yagona o‘quv darsliklarini tayyorlashni boshlashni rejalashtirmoqda, dedi Nurgaliyev.

“Vashington tomonidan moliyalashtiriluvchi, MDH mamlakatlari uchun mo‘ljallangan darsliklar va o‘quv kurslari SSSR tarixi, Markaziy Osiyo va Kavkazorti davlatlari rivojlanishida Rossiyaning o‘rni borasida noto‘g‘ri tushunchalar beradi”, — dedi Rossiya Xavfsizlik kengashi kotibi o‘rinbosari. Shu munosabat bilan Rossiya MDH doirasida umumiy madaniy-tarixiy merosni saqlab qolish masalasida hamkorlikni rivojlantirmoqchi.

Aprel boshida Rossiya Davlat dumasi spikeri Vyacheslav Volodin parlament a’zolariga Rossiya maktablarida Ikkinchi Jahon urushi tarixi o‘qitilishi sifatini tahlil qilishni buyurgandi. “Bizda urush tarixi maktab dasturida juda kam vaqt ajratilmoqda, bu birinchi masala. Ikkinchi masala shuki, bu aynan maktab o‘quvchilari o‘zlariga yangi yo‘l qidirish bilan band bo‘ladigan vaqt oralig‘iga to‘g‘ri keladi, chunki bu 10—11-sinflarga tegishlidir”, — degandi Volodin.

Aprel o‘rtalarida Rossiya ta’lim vaziri Sergey Kravsov hukumat maktablarda birinchi sinfdan boshlab tarix fanini kiritishga qaror qilganini aytdi. Vazirning so‘zlariga ko‘ra, bu tarixiy xotirani saqlash uchun zarur.