НАТО 20—28 июнь кунлари Туркияда ҳарбий машғулотлар ўтказади. Бу ҳақда мамлакат Мудофаа вазирлиги сайтида хабар берилган.
Маълумотларга кўра, Ramstein Dust II-2022 (RADU II-22) машғулотлари Кония шаҳридаги 3-асосий реактив базада ўтказилади. Қайд этилишича, ҳарбий машғулотлар Швеция ва Финляндиянинг НАТОга қабул қилиниши билан боғлиқ келишмовчиликлар фонида ўтказилмоқда.
Вазирликнинг аниқлик киритишича, машғулотларни Туркиянинг Anatolian Eagle 2022 халқаро ҳарбий машғулотлари билан биргаликда ўтказиш режалаштирилган бўлиб, у ҳаво операциялари техникаси бўйича ноёб амалиётларни ўрганиш имкониятини беради.
«Anatolian Eagle 2022 машғулотлари доирасида НАТОнинг ‘AVAKS’ тизими ҳаво қўмондонлиги ва назоратининг асосий элементларидан бири бўлади, у машғулотлар давомида олдиндан радиолокацион огоҳлантириш ва бошқариш, самолётларимиз ва миллий назорат марказларимиз билан бирга хизмат қилади», — дейилади баёнотда.
Май ойи бошида Туркия Монтрё конвенциясининг Қора денгизга ҳарбий кемалар киритилмаслиги ҳақидаги низомлари туфайли, НАТОнинг бир қатор ҳарбий ўқув машғулотларини бекор қилган ва кечиктирган эди. 1936 йилги Монтрё конвенцияси — Туркиянинг Қора ва Ўрта Ер денгизларидаги Босфор ва Дарданелла бўғозлари устидан суверенитетини тиклаган ҳужжат. Конвенциянинг 19-моддасига мувофиқ, Туркия қатнашмаётган уруш вақтида низо томонларининг ҳарбий кемалари бўғозлар орқали ўта олмайди.
Бўғозларни ёпиш ҳақидаги илтимос билан Киев Туркияга 24 февраль, Украинада ҳарбий ҳаракатлар бошланган куни мурожаат қилган эди. Кейинроқ Украина президенти Владимир Зеленский Туркия президенти Ражаб Тоййиб Эрдўғонга миннатдорлик билдирган.
Ўтган ойда Швеция ва Финляндия НАТОга аъзо бўлиш учун ариза топширган. Бу давлатлар расмийларининг қарори Украинада Россия босқини бошланганидан кейин хавфсизлик соҳасидаги ўзгаришлар билан изоҳланган.
Изоҳ (0)