Saudiya shahzodasi — Twitter’ning eng katta aksiyadorlaridan biri Ilon Maskning Twitter’ni sotib olish taklifini rad etdi

Twitter’ning eng katta aksiyadorlaridan biri Saudiya shahzodasi Al-Valid bin Talal al-Saud Tesla va SpaceX asoschisi, dunyoning eng boy odami Ilon Maskning ijtimoiy tarmoq aksiyalarining 100 foizini sotib olish taklifini rad etdi.

Men Maskning taklifi kompaniyaning rivojlanish istiqbollarini hisobga olgan holda Twitter’ning haqiqiy qiymatiga yaqin ekaniga ishonmayman. Twitter’ning eng yirik va uzoq muddatli aksiyadorlaridan biri sifatida men bu taklifni rad etaman, — deb yozdi u Twitter’da.

Mask 4-aprel kuni Twitter’ning 9,2 foiz ulushini 2,89 mlrd dollarga sotib olib, kompaniyaning eng yirik aksiyadoriga aylanib olgan edi.

Twitter rahbariyati unga direktorlar kengashiga kirishni taklif qilgan, biroq Mask rad javobini bergan.

Avvalroq Ilon Mask Twitter’ni sotib olish uchun 43 mlrd dollar naqd pul taklif qilgani haqida xabar berilgan edi. Uning fikricha kompaniya hozirgi ko‘rinishida so‘z erkinligini ta’minlay olmaydi.