Rossiyada yillik inflyatsiya 17,5 foizgacha tezlashdi

Rossiyada yillik inflyatsiya (2-apreldan 8-aprelgacha) 17,49 foizgacha tezlashdi. 1-aprel holatiga ko‘ra iste’mol narxlari indeksi 16,69 foizni tashkil etdi. 8-aprel kuni oziq-ovqat inflyatsiyasi 19,1 foizga yetdi. Bu haqda Rossiya Iqtisodiy rivojlanish vazirligi ma’lumotlariga tayanib, “Vedomosti” xabar bermoqda.

2-apreldan 8-aprelgacha bo‘lgan hafta davomida Rossiyada iste’mol narxlari 0,66 foizga oshdi. Rosstat ma’lumotlariga ko‘ra, mart oyiga nisbatan inflyatsiya sekinlashdi. Ammo yil boshidan buyon iste’mol narxlari indeksi 10,8 foizga yetdi. Taqqoslash uchun: 2021-yil aprel oyida inflyatsiya yil boshidan buyon 2,72 foizni tashkil etgan edi.

2-apreldan 8-aprelgacha eng ko‘p margarin (3,1 foiz), qora choy (2,2 foiz), shokolad (2,1 foiz), pechenye (1,9 foiz), makaron mahsulotlari (1,8 foiz) qimmatlashgan. Tovuq go‘shti, qaynatilgan kolbasa, grechka va tuzning narxlari 1,6 foizdan ko‘tarilgan. 

Oziq-ovqat inflyatsiyasining o‘sishiga eng katta hissa meva-sabzavot mahsulotlari narxlari ko‘tarilishiga to‘g‘ri kelgan. 

Rublning mustahkamlanishi fonida nooziq-ovqat mahsulotlari narxlarining o‘sishi ham sekinlashishda davom etgan (bir hafta oldingi 0,9 foizdan keyin 0,51 foizga).

Rossiya Markaziy bankining prognoziga ko‘ra, 2022-yil oxiriga kelib Rossiyada inflyatsiya 20 foizni tashkil qiladi, 2023-yilda esa 8 foizgacha kamayadi. 

Avvalroq AQShda yillik inflyatsiya 40 yil ichida rekord 7,9 foizga yetgani haqida xabar berilgan edi.