Fransiya sobiq prezidentlari Olland va Sarkozi saylovda Makronning nomzodini qo‘llab-quvvatlamoqda

Fransiyaning sobiq prezidenti, sotsialist Fransua Olland vatandoshlarini 24-aprel kuni bo‘lib o‘tadigan prezidentlik saylovlarining ikkinchi bosqichida amaldagi prezident Emmanuel Makron uchun ovoz berishga chaqirdi.

“Men bu yerda axloqdan dars berish va fransuzlarga nima qilishi kerakligini o‘rgatish uchun turganim yo‘q, lekin bu kabi saylovlarda Fransiya — asosiy masala. Natija muhimligini hisobga olib, men fransuzlarni Emmanuel Makronga ovoz berishga chaqiraman”,— dedi Olland TF1 telekanalida.

Uning fikricha, Makronning ikkinchi raunddagi raqibi va millatchi “Milliy uyushma” yetakchisi Marin Le Penning g‘alabasi “o‘ta xavfli” bo‘ladi.

“Eng muhimi, Fransiya kelajagimiz uchun o‘ta xavfli bo‘lishi mumkin bo‘lgan qo‘llarga tushmasligi zarur”, — deb tushuntirdi Olland o‘z pozitsiyasini.

Avvalroq Fransiyaning yana bir sobiq prezidenti, o‘ng markazchi Nikolya Sarkozi ikkinchi turda Makronga ovoz berishini aytgan.

“Respublikachilarning huquqiy qadriyatlari va hokimiyatdagi madaniyatimizga sodiqlik bizni Emmanuel Makronning birlikka chaqiruviga javob berishga undashi kerak”, — deb yozgan Sarkozi o‘z bayonotida.

10-aprelda Fransiyada prezidentlik saylovlarining birinchi turi bo‘lib o‘tgan. Dastlabki tur natijalariga ko‘ra amaldagi prezidenti Emmanuel Makron 27,84 foiz, Marin Le Pen esa 23,15 foiz ovoz olgan. Uchinchi o‘rin “Yengilmas Fransiya” partiyasi yetakchisi Jan-Lyuk Melanshonga (21,95 foiz) nasib qilgan, qolgan nomzodlar esa 8 foiz va undan kam ovoz to‘plagan.

Makron va Le Pen saylovlarning ikkinchi turida ishtirok etadi va u 24-aprelda o‘tkaziladi.

Prezidentlik saylovi kampaniyasi vaqtida Marin Le Pen mamlakat rahbarligiga saylansa, Fransiyani Yevropa Ittifoqi hamda NATO a’zoligidan chiqarishni, shuningdek, yevro rad etilishi, ikkinchi fuqarolik berish imkoniyatidan voz kechilishini va’da bergandi. Biroq oradan hech qancha vaqt o‘tmay, Le Pen ushbu va’dalaridan voz kechgan.

O‘z bayonotlarida Le Pen Qrimni hamon Rossiyaniki deb bilishini ta’kidlaydi. Le Penning fikricha, tarixni qayta yozish mumkin emas, chunki Qrimda referendum o‘tkazilgan. Prezidentlikka nomzodning aniqlik kiritishicha, Qrim avvallari Rossiyaniki bo‘lgan va odamlar Rossiya bilan birlashishga o‘zlari qaror qilgan.

Mariya Le Pen saylovlarda g‘alaba qozongan va Rossiyaning Donbassdagi “maxsus operatsiyasi” yakunlangan taqdirda, NATOga Rossiya bilan yaqinlashishni taklif qilmoqchi. U avvalroq Rossiyaning energiya manbalariga qarshi sanksiyalarga qarshi chiqqan edi.