Seul Moskvaga nisbatan bosimni kuchaytirishi va jahon hamjamiyatining harakatini qo‘llab-quvvatlashi kerak. Bu haqda Janubiy Koreyaning yangi prezidenti Yun Sok Yol Washington Post gazetasiga bergan intervyusida ma’lum qildi.
“Biz Rossiyaga nisbatan amaldagi hukumat tomonidan ma’lum darajada olib borilayotgan xalqaro bosim kampaniyasida ishtirok etishimiz kerak”, — deydi Yun Sok Yol.
Davlat rahbarining qo‘shimcha qilishicha, xalqaro hamjamiyat Seuldan faolroq harakatlar talab qilsa, Janubiy Koreya hukumati “o‘z munosabatini — xalqaro tartibga hurmatini qat’iy namoyish etishi kerak”.
Uning so‘zlariga ko‘ra, Janubiy Koreya Ukrainaga hozirga qadar 10 million dollarlik harbiy yordam yuborgan, biroq hukumat buni yetarli deb hisoblamaydi. Shu sababli prezident hukumatga Seul Kiyevni qanday qo‘llab-quvvatlay olishini o‘rganishni buyurgan.
13-aprel kuni Yonhap agentligi Janubiy Koreya hukumati Ukrainaga umumiy qiymati 1,6 million dollarlik qo‘shimcha himoya nimchalari va shlemlar, shuningdek, dori vositalari va oziq-ovqat mahsulotlarini berishga qaror qilgani haqida yozgandi.
Avvalroq Janubiy Koreya mudofaa vaziri So Uk Ukrainaga qurol yetkazib berish imkoniyatini rad etgan edi. Bungacha Janubiy Koreya Tashqi ishlar vazirligi rahbari Chon Iy Yen Seul Kiyevga 30 million dollarlik gumanitar yordam yetkazishni va uning umumiy miqdorini 40 million dollarga oshirishni rejalashtirayotganini ma’lum qilgandi. Bir necha kun oldin Ukraina prezidenti Vladimir Zelenskiy Janubiy Koreyaga harbiy yordam so‘rab murojaat qilgan.
Eslatib o‘tamiz, Janubiy Koreyada prezidentlik saylovlari 9-mart kuni bo‘lib o‘tgan va Yun Sok Yol 48,59 foiz ovoz bilan unda g‘alaba qozongan edi. U “Fuqarolik kuchi” muxolifat konservativ partiyasi nomzodi hisoblanadi. Inauguratsiya marosimi 10-may kuni bo‘lib o‘tadi.
Izoh (0)