Surxondaryoda Afg‘oniston fuqarolari uchun qisqa muddatli o‘quv kurslari tashkil etiladi

O‘zbekistondagi Afg‘oniston fuqarolarining ta’lim olishini qo‘llab-quvvatlash uchun qisqa muddatli o‘quv kurslari tashkil etiladi. Bu haqda BMT Taraqqiyot dasturining O‘zbekistondagi vakolatxonasiga tayanib, “Gazeta.uz” xabar berdi.

7-aprel kuni Toshkentda Oliy va o‘rta maxsus ta’lim vazirligi, Yevropa Ittifoqining (YI) O‘zbekistondagi delegatsiyasi va BMT Taraqqiyot dasturi (BMTTD) shu kabi tashabbus bilan chiqqan. Qayd etilishicha, mazkur kengaytirilgan dastur hamda qisqa muddatli o‘quv kurslari afg‘onistonliklarga gumanitar, pedagogika va muhandislik sohalarida bilim egallashga yordam beradi. Loyiha Termizdagi Afg‘oniston fuqarolarini o‘qitish ta’lim markazi bilan hamkorlikda amalga oshiriladi. Markaz o‘quv jarayoniga O‘zbekistondagi tegishli muassasalarning ta’lim va o‘quv resurslarini ham jalb qilishi mumkin.

Loyiha doirasida jami 345 nafar Afg‘oniston fuqarosi ta’lim grantlarini qo‘lga kiritib, o‘qishni tamomlaganidan so‘ng tegishli diplom va sertifikatlarga ega bo‘ladi.

Xususan:

• hozirda markazda tahsil olayotgan afg‘onistonlik 145 nafar talaba, jumladan, 24 nafar xotin-qiz ta’lim jarayonini davom ettiradi;
• 100 nafar Afg‘oniston fuqarosi bir yillik texnik hamda kasbiy ta’lim va tayyorgarlik (TKTT) dasturi doirasida o‘qitiladi;
• 100 nafar Afg‘oniston fuqarosi qisqa muddatli kasbiy kurslarda ta’lim oladi.

2022-yilda BMTTD tomonidan bajariladigan tashabbus uchun YI 1 million yevro mablag‘ ajratgan. Ittifoq delegatsiyasi rahbari, elchi Sharlotta Adrianning ta’kidlashicha, Yevropa Ittifoqi hozirgi og‘ir sharoitda Afg‘oniston xalqini qo‘llab-quvvatlashda davom etadi.

“Umid qilamizki, bizning uzoq yillik hamkorimiz bo‘lgan BMTTD tomonidan amalga oshirilayotgan bu loyiha O‘zbekistonda istiqomat qilayotgan Afg‘oniston fuqarolariga yangi bilim va ko‘nikmalar olishlarida ko‘maklashishi barobarida, ularga o‘z vatanlariga qaytishdan oldin turmush sharoitlarini yaxshilash va oilalarini qo‘llab-quvvatlashga yordam beradi”, — deydi u.

Shuningdek, loyihaga Oliy va o‘rta maxsus ta’lim vazirligi asosiy hamkor bo‘ladi.

Tashabbus markaz salohiyatini yanada mustahkamlaydi va uni Afg‘oniston uchun ta’lim markaziga aylantirishga imkoniyat yaratishi ta’kidlangan. Natijada Afg‘oniston fuqarolari O‘zbekistondagi ko‘plab universitetlar, institutlar va kollejlarning ta’lim xizmatlaridan foydalanishlari mumkin bo‘ladi. Shuningdek, markaz YI bilimlar markazini ochish va unda onlayn masofaviy o‘qitish vositasini ishga tushirish uchun platformaga ham aylanadi.

Avvalroq O‘zbekiston Termiz—Mozori Sharif—Kobul—Peshovar transafg‘on temiryo‘li qurilishini boshlagani, O‘zbekiston, Afg‘oniston va Pokiston o‘rtasida xalqaro yuk tashuvlarida yuzaga kelayotgan muammolar muhokama etilgani to‘g‘risida xabar berilgandi.