Сурхондарёда Афғонистон фуқаролари учун қисқа муддатли ўқув курслари ташкил этилади

Ўзбекистондаги Афғонистон фуқароларининг таълим олишини қўллаб-қувватлаш учун қисқа муддатли ўқув курслари ташкил этилади. Бу ҳақда БМТ Тараққиёт дастурининг Ўзбекистондаги ваколатхонасига таяниб, «Gazeta.uz» хабар берди.

7 апрель куни Тошкентда Олий ва ўрта махсус таълим вазирлиги, Европа Иттифоқининг (ЕИ) Ўзбекистондаги делегацияси ва БМТ Тараққиёт дастури (БМТТД) шу каби ташаббус билан чиққан. Қайд этилишича, мазкур кенгайтирилган дастур ҳамда қисқа муддатли ўқув курслари афғонистонликларга гуманитар, педагогика ва муҳандислик соҳаларида билим эгаллашга ёрдам беради. Лойиҳа Термиздаги Афғонистон фуқароларини ўқитиш таълим маркази билан ҳамкорликда амалга оширилади. Марказ ўқув жараёнига Ўзбекистондаги тегишли муассасаларнинг таълим ва ўқув ресурсларини ҳам жалб қилиши мумкин.

Лойиҳа доирасида жами 345 нафар Афғонистон фуқароси таълим грантларини қўлга киритиб, ўқишни тамомлаганидан сўнг тегишли диплом ва сертификатларга эга бўлади.

Хусусан:

• ҳозирда марказда таҳсил олаётган афғонистонлик 145 нафар талаба, жумладан, 24 нафар хотин-қиз таълим жараёнини давом эттиради;
• 100 нафар Афғонистон фуқароси бир йиллик техник ҳамда касбий таълим ва тайёргарлик (ТКТТ) дастури доирасида ўқитилади;
• 100 нафар Афғонистон фуқароси қисқа муддатли касбий курсларда таълим олади.

2022 йилда БМТТД томонидан бажариладиган ташаббус учун ЕИ 1 миллион евро маблағ ажратган. Иттифоқ делегацияси раҳбари, элчи Шарлотта Адрианнинг таъкидлашича, Европа Иттифоқи ҳозирги оғир шароитда Афғонистон халқини қўллаб-қувватлашда давом этади.

«Умид қиламизки, бизнинг узоқ йиллик ҳамкоримиз бўлган БМТТД томонидан амалга оширилаётган бу лойиҳа Ўзбекистонда истиқомат қилаётган Афғонистон фуқароларига янги билим ва кўникмалар олишларида кўмаклашиши баробарида, уларга ўз ватанларига қайтишдан олдин турмуш шароитларини яхшилаш ва оилаларини қўллаб-қувватлашга ёрдам беради», — дейди у.

Шунингдек, лойиҳага Олий ва ўрта махсус таълим вазирлиги асосий ҳамкор бўлади.

Ташаббус марказ салоҳиятини янада мустаҳкамлайди ва уни Афғонистон учун таълим марказига айлантиришга имконият яратиши таъкидланган. Натижада Афғонистон фуқаролари Ўзбекистондаги кўплаб университетлар, институтлар ва коллежларнинг таълим хизматларидан фойдаланишлари мумкин бўлади. Шунингдек, марказ ЕИ билимлар марказини очиш ва унда онлайн масофавий ўқитиш воситасини ишга тушириш учун платформага ҳам айланади.

Аввалроқ Ўзбекистон Термиз—Мозори Шариф—Кобул—Пешовар трансафғон темир йўли қурилишини бошлагани, Ўзбекистон, Афғонистон ва Покистон ўртасида халқаро юк ташувларида юзага келаётган муаммолар муҳокама этилгани тўғрисида хабар берилганди.