Termiz tumanida tashkil etilgan Oliy va o‘rta maxsus ta’lim vazirligi huzuridagi Afg‘oniston fuqarolarini o‘qitish ta’lim markazining tantanali ochilish marosimi bo‘lib o‘tdi. Bu haqda O‘zA xabar bermoqda.
Yangi o‘quv markazida Afg‘oniston tomoni ehtiyojlaridan kelib chiqib, 17 oliy va 16 o‘rta maxsus, kasb-hunar ta’lim yo‘nalishi o‘quv rejalarining modullashtirilgan shakli ishlab chiqilgan. Qo‘shni davlat yoshlariga o‘zlari tanlagan kasb sirlarini chuqur o‘rgatish uchun O‘zbekiston oliy ta’lim muassasalaridan malakali professor-o‘qituvchilar jalb etilgan.
Shuningdek, oliy ta’lim muassasalari korporativ tarmog‘i orqali “Elektron ta’lim tarmog‘i”ga ulanib, O‘zbekistonning istalgan oliy ta’lim muassasasi yetuk olim va mutaxassislari tomonidan videokonferensiya orqali masofadan turib mashg‘ulot o‘tkazish imkoniyati mavjud.
Ta’lim markazining ilk talabalari o‘zbek tili va adabiyoti yo‘nalishiga qabul qilindi. Ular ikki yil davomida soha bo‘yicha yetuk mutaxassis bo‘lib yetishadi.
Markazning ko‘p qavatli muhtasham o‘quv binosi, 110 o‘ringa mo‘ljallangan talabalar yotoqxonasi, axborot-resurs markazi, sport zali va sport maydonchalari, oshxona afg‘onistonlik talabalar uchun xizmat qiladi. Binoda kimyo va fizika kabi fanlarni chuqur o‘zlashtirish, temir yo‘l transporti tizimini puxta o‘rganish uchun lingafon xonalari, laboratoriyalar tashkil etilgan. Maishiy, savdo va boshqa xizmatlar ko‘rsatadigan shoxobchalar mavjud
Axborot-resurs markazi iqtisodiy-texnik va ijtimoiy-gumanitar yo‘nalishlardagi fanlar bo‘yicha yetarli o‘quv va yordamchi darsliklar, badiiy va ijtimoiy-siyosiy adabiyotlar, O‘zbekistonda ishlangan 50 dan ortiq badiiy va hujjatli filmlar, audioto‘plamlar disklari bilan to‘ldirilgan. Elektron kutubxona tizimiga lotin alifbosidagi 700 dan ziyod elektron adabiyot joylashtirilgan.
— Bobom bundan 110 yil ilgari Buxoroda madrasada tahsil olgan, — dedi Afg‘oniston prezidentining MDH davlatlari bilan hamkorlikni rivojlantirish bo‘yicha maxsus vakili Muhammad Shokir Korgar. — Bugun bu maskanning tantanali ochilishi Amir Temur, Alisher Navoiy, Beruniy singari ko‘plab ulug‘ zotlarning ruhini shod etdi. Afg‘onistonda 7 millionga yaqin o‘zbek millatiga mansub aholi yashaydi. Termizda barpo etilgan ushbu ta’lim muassasasi maktab va bog‘chalarimizdagi o‘zbek tili mutaxassislariga bo‘lgan ehtiyojni ta’minlaydi. Kelgusida temir yo‘l, energetika va boshqa sohalarda ham malakali mutaxassislar tayyorlab beradi. Bunday ulug‘ ishning tashabbuskori bo‘lgan Prezident Shavkat Mirziyoyevdan benihoya minnatdormiz.
—Afg‘onistonda o‘zbek tili uchinchi davlat tili sanaladi. Biroq, bu tildan saboq beradigan mutaxassislar juda kam, — deydi Afg‘oniston tijorat va sanoat vazirligi mas’ul xodimi Musofir Qo‘qondiy. – Afg‘onistonning turli hududlaridagi ana shu talabni e’tiborga olib, kelajakda murabbiy bo‘lishni ko‘ngliga tukkan 100 ga yaqin o‘g‘il-qiz ushbu markazda o‘qishga jalb etildi. Ayni paytda dunyoning bir qator davlatlarida minglab afg‘on yoshlari ta’lim olib, kasb o‘rganmoqda. Lekin, afg‘on o‘g‘il-qizlari uchun birorta mamlakatda O‘zbekistondagi kabi muhtasham maxsus ta’lim muassasasi yo‘q.
Kelgusida markazni yanada kengaytirish, yozgi oshxona va novvoyxona, hammom va kir yuvish binosini yangidan qurish rejalashtirilgan. 300 o‘rinli qo‘shimcha yotoqxona barpo etish mo‘ljallangan. O‘quv ishlab chiqarish ustaxonasi rekonstruksiya qilinib, yangi bino quriladi. Afg‘onistonlik talaba-yoshlarning o‘qishi, kasb o‘rganishi, bo‘sh vaqtini mazmunli o‘tkazishi uchun qo‘shimcha sharoitlar yaratiladi.
Izoh (0)