Shavkat Mirziyoyev Qirg‘iziston prezidenti bilan oliy darajadagi kelishuvlar ijrosining borishini muhokama qildi

O‘zbekiston prezidenti Shavkat Mirziyoyev 8-aprel kuni Qirg‘iziston prezidenti Sadir Japarov bilan telefon orqali muloqot qildi. Bu haqda davlat rahbarining matbuot xizmati xabar berdi.

Ma’lum qilinishicha, davlat rahbarlari muqaddas Ramazon oyi boshlangani bilan bir-birini samimiy tabriklab, birodar O‘zbekiston va Qirg‘iziston xalqlariga tinchlik-osoyishtalik, farovonlik va ravnaq tilagan.

Ikki mamlakat o‘rtasidagi do‘stlik, yaxshi qo‘shnichilik va strategik sheriklik munosabatlarini yanada mustahkamlash, amaliy hamkorlikni kengaytirish bo‘yicha avval erishilgan kelishuvlar amalga oshirilishining borishi batafsil muhokama qilingan.

O‘zaro manfaatli hamkorlikning ustuvor yo‘nalishlarini ilgari surishga, shu jumladan, O‘zbekiston—Qirg‘iziston taraqqiyot jamg‘armasi faoliyatini boshlash, Qambarota 1-gidroelektr stansiyasi va Xitoy—Qirg‘iziston—O‘zbekiston temiryo‘lini qurish bo‘yicha infratuzilmaviy loyihalarni jadallashtirish, sanoat kooperatsiyasini kengaytirishga alohida e’tibor qaratilgan.

Shuningdek, madaniy-gumanitar sohadagi sermahsul almashinuvlar va qo‘shma dasturlar amalga oshirilayotgani katta mamnuniyat bilan qayd etilgan. Qabul qilingan qarorlarni so‘zsiz bajarish maqsadida hukumatlar darajasida faol muloqotlarni davom ettirishga kelishib olingan.

“Davlat rahbarlari bo‘lajak oliy darajadagi uchrashuvlar rejasini ko‘rib chiqdilar. Mintaqaviy kun tartibining dolzarb masalalari yuzasidan fikr almashildi. O‘zbekiston va Qirg‘iziston pezidentlarining telefon orqali muloqoti har doimgidek ochiq, ishonchli va do‘stona ruhda o‘tdi”, — deyiladi xabarda.

Eslatib o‘tamiz, 2021-yilning martida Qirg‘iziston prezidenti Sadir Japarov davlat tashrifi bilan O‘zbekistonga kelgandi. O‘shanda Ko‘ksaroy qarorgohida prezident Sadir Japarov va O‘zbekiston prezidenti Shavkat Mirziyoyevning rasmiy uchrashuv marosimi bo‘lib o‘tgandi, shundan so‘ng davlat rahbarlari tor va kengaytirilgan tarkibda ikki tomonlama muzokaralar o‘tkazdi. Muzokaralar yakunida ikki mamlakat prezidentlari qo‘shma bayonotni qabul qilgan. Unda ochiq, do‘stona va konstruktiv muhitda o‘tgan muzokaralar samarali bo‘lganligi qayd etilgan edi.