Yaman shimolini boshqarayotgan “Ansar Alloh” harakati (xusiylar) Rossiyadan bug‘doy sotib olishga va hisob-kitoblarni rublda amalga oshirishga tayyorligini ma’lum qildi, deb xabar beradi “RIA Novosti”.
Rossiya Davlat dumasi spikeri Vyacheslav Volodin 30-mart kuni rublga eksport qilinadigan tovarlar, xususan, o‘g‘itlar, don, yog‘, neft, ko‘mir, metall va yog‘ochlar ro‘yxatini kengaytirishni to‘g‘ri deb bilishini aytgan.
“Rossiya bir muddat oldin Yamanga bug‘doy yordamini taklif qilgan edi, shuning uchun biz Tashqi ishlar vazirligidagi birodarlarimizga Rossiyadan bug‘doy va hosilalar sotib olish uchun bog‘lanishlarini aytamiz, bu yaxshi kelishuv, ham rublda, ham boshqa valyutalardan uzoqda”, — deb yozadi “Ansar Alloh” siyosiy byuro Oliy kengashi a’zosi Muhammad Ali al-Xusiy.
Yamandagi mojarolar 2014-yildan beri davom etmoqda. Harbiy ziddiyatlar 2015-yilning mart oyida Saudiya Arabistoni boshchiligidagi koalitsiya kuchlarining respublika prezidenti Mansur Hodiy tarafiga kelib qo‘shilganidan so‘ng kuchaydi. Ularga Eron tomonidan qo‘llab-quvvatlanayotgan “Ansar Alloh” harakati tarkibiga kiruvchi yamanlik isyonchilar qarshilik ko‘rsatmoqda. BMTning 2021-yil noyabrdagi ma’lumotlariga ko‘ra, Yamandagi urush oqibatida 377 ming kishi halok bo‘lgan, ularning 40 foizi bevosita jangovar harakatlar qurboniga aylangan.
Izoh (0)