Fransiya harbiy razvedkasining rahbari, general Erik Vido razvedka Fransiya rahbariyatiga Rossiyaning Ukrainada harbiy operatsiya o‘tkazish rejalari haqida yetarli ma’lumot bera olmagani uchun o‘z lavozimini muddatidan oldin tark etmoqda. Bu haqda L’Opinion gazetasi, shuningdek, AFP agentligi va France Info nashrining manbalari xabar bermoqda.
General o‘zining iste’fosi haqida 30-mart kuni olgan elektron pochta xati orqali xabar topgan. Vido “yetarlicha ma’lumot yo‘qligi” va “mavzudan yetarlicha xabardor bo‘lmagani” tufayli ishdan bo‘shatilgan”, deb yozadi nashrlar harbiy manbalarga tayanib.
AFP xabariga ko‘ra, yuqori martabali zobitning ishdan bo‘shatilishi haqidagi ma’lumotlar bir necha kun avval paydo bo‘lgan. Vidoning boshqa lavozimga tayinlanishi kutilgandi, ammo yakunda bunday bo‘lib chiqmadi.
Mart oyi boshida, Rossiyaning Ukrainadagi harbiy amaliyoti boshlanganidan ko‘p o‘tmay, Fransiya Bosh shtabi boshlig‘i general Tyeri Burkxard Le Monde gazetasiga bergan intervyusida fransuz razvedkasi Amerika razvedkasidan farqli o‘laroq, Moskvaning harbiy amaliyot rejalari haqidagi prognozlarida yanglishganini tan olgandi.
Vido Bosh shtabga bo‘ysunuvchi harbiy razvedkani yetti oy davomida boshqardi. U mazkur lavozimga 2021-yilning yozida tayinlangandi. Ilgari u Fransiyaning maxsus operatsiyalar qo‘mondonligini (Commandement des Operations Speciales yoki COS) boshqargan.
Rossiya prezidenti Vladimir Putin 24-fevral kuni Ukrainada “denasifikatsiya va demilitarizatsiya” maqsadida harbiy operatsiya boshlanganini e’lon qildi. Kiyev Moskva bilan diplomatik munosabatlarni uzdi va harbiy holat joriy qildi.
O‘shandan beri Putin va Fransiya prezidenti Emmanuel Makron bir necha bor telefon orqali gaplashib, Ukrainadagi vaziyatni muhokama qilgan. Ikki davlat rahbarlarining so‘nggi suhbati 29-mart kuni bo‘lib o‘tgan, unda boshqa narsalar qatori tinch aholini Mariupoldan evakuatsiya qilish bilan bog‘liq masalalar ko‘tarilgan: Rossiya Mudofaa vazirligi Mariupolda gumanitar falokat yuz berganini e’lon qilgandi, shahar meri Vadim Boychenko esa shaharda qolgan aholining hammasini evakuatsiya qilishga chaqirgan, chunki Mariupolda elektr, issiqlik va ichimlik suvi tugagan.
Izoh (0)