Яман шимолини бошқараётган «Aнсaр Аллоҳ» ҳаракати (хусийлар) Россиядан буғдой сотиб олишга ва ҳисоб-китобларни рублда амалга оширишга тайёрлигини маълум қилди, деб хабар беради «РИА Новости».
Россия Давлат думаси спикери Вячеслав Володин 30 март куни рублга экспорт қилинадиган товарлар, хусусан, ўғитлар, дон, ёғ, нефть, кўмир, металл ва ёғочлар рўйхатини кенгайтиришни тўғри деб билишини айтган.
«Россия бир муддат олдин Яманга буғдой ёрдамини таклиф қилган эди, шунинг учун биз Ташқи ишлар вазирлигидаги биродарларимизга Россиядан буғдой ва ҳосилалар сотиб олиш учун боғланишларини айтамиз, бу яхши келишув, ҳам рублда, ҳам бошқа валюталардан узоқда», — деб ёзади «Aнсaр Аллоҳ» сиёсий бюро Олий кенгаши аъзоси Муҳаммад Али ал-Хусий.
Ямандаги можаролар 2014 йилдан бери давом этмоқда. Ҳарбий зиддиятлар 2015 йилнинг март ойида Саудия Арабистони бошчилигидаги коалиция кучларининг республика президенти Мансур Ҳодий тарафига келиб қўшилганидан сўнг кучайди. Уларга Эрон томонидан қўллаб-қувватланаётган «Aнсaр Аллоҳ» ҳаракати таркибига кирувчи яманлик исёнчилар қаршилик кўрсатмоқда. БМТнинг 2021 йил ноябрдаги маълумотларига кўра, Ямандаги уруш оқибатида 377 минг киши ҳалок бўлган, уларнинг 40 фоизи бевосита жанговар ҳаракатлар қурбонига айланган.
Изоҳ (0)