Rossiya harbiy operatsiyalarni boshlaganidan beri Ukrainadan 2 mlndan ziyod bolalar chiqib ketgan — YUNISEF

BMTning bolalar fondi YUNISEF 24-fevraldan beri, ya’ni Rossiya Ukraina hududida harbiy operatsiyalarni boshlagandan keyin mamlakatdan 2 million atrofida bola chiqib ketganini ma’lum qildi.

YUNISEF ma’lumotlariga ko‘ra, harbiy nizo oqibatida 100 dan ziyod bola halok bo‘lgan, 130 nafar voyaga yetmaganlar esa turli darajada jarohatlar olgan.

1,1 milliondan ziyod bolalar Polshaga, qolgan 100 ming bolalar esa Ruminiya, Moldova, Vengriya, Slovakiya va Chexiyaga olib borilgan, deb xabar bermoqda YUNISEFga tayanib CNN.

Ukraina hududida 2,5 milliondan ziyod bola boshqa xavfsiz yerga ko‘chib o‘tgan. CNN BMTning zo‘ravonliklar sabab bolalar savdosi va ularni qul qilib ishlatish holatlari ko‘payishi haqida ogohlantirganini qayd etgan. YUNISEF bu kabi xavflarning oldini olish uchun ukrainalik qochoqlarning oilalari uchun turli tahdidlardan holi joylar hozirlash zarurligi yuzasidan tavsiyalar bergan.

BMT ma’lumotlari bo‘yicha Ukrainadagi urushda 1189 nafar tinch aholi vakillari halok bo‘lgan, 1901 kishi yaralangan.