“Tolibon” tomonidan shakllantirilgan Afg‘oniston hukumatining birinchi diplomati “o‘tgan oy” Moskvaga kelgan va Rossiya Tashqi ishlar vazirligida akkreditatsiya olgan. Bu haqda Rossiya tashqi ishlar vaziri Sergey Lavrov ma’lum qildi, deb xabar beradi “Intefaks”.
Uning fikricha, “boshqaruv tajribasining yetishmasligi, moliya-iqtisodiy cheklovlar, AQSH va uning ittifoqchilari tomonidan siyosiy-diplomatik bosimlar”ga qaramay, Afg‘onistonning yangi hukumati “umuman olganda, davlatni barqaror boshqarishni uddalamoqda”.
Lavrov jahon hamjamiyatini Afg‘onistonning yangi hukumati bilan faolroq hamkorlik qilishga chaqirgan. Tashqi ishlar vazirining hisoblashicha, “Tolibon” hukumatining rasman tan olinishiga asosiy to‘siq uning vakillik qobiliyatining yo‘qligi bo‘lib qolmoqda. “Men hokimiyatda nafaqat mamlakatning turli etnik guruhlari, milliy va konfessiyaviy ozchiliklar, balki siyosiy kuchlar manfaatlarini himoya qiladigan shaxslarning yo‘qligini nazarda tutyapman”, — deya tushuntiradi u.
Eslatib o‘tamiz, “Tolibon” harakati 2021-yilning avgustida AQSH va NATO kuchlari Afg‘onistonni tark etishi fonida hokimiyat tepasiga kelgan edi.
Avvalroq “Tolibon” tomonidan shakllantirilgan Afg‘oniston hukumati Qirg‘izistondan afg‘on qishloq xo‘jaligi mahsulotlarini Rossiya bozoriga eksport qilishda yordam so‘ragan edi.
Izoh (0)