Braziliya prezidenti Jair Bolsonari Rossiya yetakchisi Vladimir Putindan atom suvosti kemasini qurish loyihasida ishtirok etishni so‘radi, deb xabar beradi Folha de S.Paulo nashri.
Nashr ma’lumotlariga ko‘ra, Bolsonaru bu kabi bayonotni fevral oyida bildirgan. Siyosatchi AQSh loyihani amalga oshirishda yordam berishdan bosh tortgani sabab shu kabi qadamni tashlagan.
“Qo‘shma Shtatlar Braziliya atom suvosti kemasi loyihasini rad etgani prezident Jair Bolsonaruni Vladimir Putindan yordam so‘rab, murojaat qilishga undagan”, — deyiladi xabarda.
Nashrning yozishicha, suvosti kemasini yaratishdagi muammolardan biri — atom suvosti kemasida ishlatilishi kerak bo‘lgan yonilg‘ini sertifikatlash bilan bog‘liq.
Shuningdek, Tog‘-kon sanoati va energetika vaziri, zaxiradagi admiral Bentu Albukerke Rossiyaning davlat atom energetika kompaniyasi “Rosatovm” bilan uning “Angra-3” AESdagi ishtiroki to‘g‘risida gaplashganini tasdiqlagan.
“Angra” AESning uchinchi energoblokini qurish 1984-yilda boshlangan, biroq oradan ikki yil o‘tib, loyiha to‘xtab qolgan. 2008-yilda Braziliya hukumati AESni qurish qayta tiklanishini ma’lum qilgan.
Avvalroq Braziliya prezidenti harbiy to‘ntarish uyushtirishga tayyorgarlik ko‘rishda ayblangani, Braziliya senatorlari koronavirus bilan bog‘liq vaziyat sabab prezident Bolsonaruga qarshi ayblovni ma’qullagani to‘g‘risida xabar berilgandi. Bolsonaru va hukumatning boshqa a’zolari kollektiv immunitetga erishish umidida koronavirusning aholi orasida tarqalishiga yo‘l qo‘yganlikda ayblangan edi.
Izoh (0)