Braziliyada bir guruh siyosatchi va jamoat arboblari tarqatgan bayonotga ko‘ra, mamlakat prezidenti Jair Bolsonaru davlat to‘ntarishi tayyorlayotgan bo‘lishi mumkin. Bu haqda Daily Mail xabar berdi.

Foto: Reuters

Sobiq prezidentlar, bosh vazirlar va siyosatchilardan tashkil topgan nufuzli guruh tomonidan yozilgan xatda Bolsonaru tarafdorlarining 7-sentabrga rejalashtirilgan mitinglari harbiy to‘ntarish ekani ta’kidlangan.

Maktubni imzolaganlar orasida Ispaniya sobiq bosh vaziri Xose Luis Rodriges Sapatero, Gretsiya sobiq moliya vaziri Yanis Varufakis, Paragvay sobiq prezidenti Fernando Lugo, Britaniyaning Leyboristlar partiyasi sobiq rahbari Jeremi Korbin va boshqalar bor.

Imzo egalarining ta’kidlashicha, Braziliyadagi vaziyat yanvar oyida Vashingtonda Kapitoliyning qo‘lga olinishi bilan o‘xshash. Siyosatchilar da’vo qilishicha, Bolsonaru tarafdorlarining Oliy sudga hamda “oq tanlilar tarafdorlari”, harbiy politsiya va hukumat amaldorlari ishtirokidagi Kongress siyosatiga qarshi umummilliy marshlari “dunyodagi uchinchi eng yirik demokratiya to‘ntarishiga urinish” gumonini keltirib chiqaradi.

“Biz Braziliyaning demokratik institutlariga yaqinlashib kelayotgan tahdiddan jiddiy xavotirdamiz, ularni 7-sentabrgacha va undan keyin ham himoya qilishga shaymiz. Braziliya xalqi demokratiyani harbiy boshqaruvdan himoya qilish uchun o‘nlab yillar kurashdi. Endi Bolsonaruning buni tortib olishiga ruxsat berib bo‘lmaydi”, — deya ta’kidlagan siyosatchilar.

Ular, shuningdek, 10-avgust kuni Bolsonaru Braziliya poytaxtida “misli ko‘rilmagan harbiy parad” o‘tkazganini eslatdi. Bu prezidentning Kongressdagi maslakdoshlari tomonidan parlamentda ovoz berish tizimini isloh qilish to‘g‘risidagi qonun loyihasini qabul qildirishga urinishlar fonida bo‘lib o‘tdi.

Prezidentning o‘zi 21-avgust kuni uning tarafdorlari tomonidan o‘tkazilgan mitinglar Kongress va Oliy sudga qarshi “zaruriy qarshi hujumga” tayyorgarlik ekanini aytgan. Bolsonaru, shuningdek, ham poytaxt Braziliyadagi, ham iqtisodiy poytaxt San-Pauludagi mitinglarda qatnashishni rejalashtirmoqda.

Ikkinchi muddatga saylanishga qaror qilgan Braziliya prezidenti Jair Bolsonaru mamlakatdagi elektron ovoz berish tizimi manipulyatsiyaga moyilligini bir necha bor ta’kidlagan va qog‘ozda ovoz berishni taklif qilgan.

Biroq bu ovoz berish tizimini o‘zgartirishni ko‘zda tutishi sababli, Braziliya Kongressi (parlamenti) quyi palatasi prezident taklif qilgan konstitutsiyaviy tuzatishni rad etdi.

Bolsonaru 2022-yilda bo‘lajak prezident saylovlari natijalari soxtalashtirilgan taqdirda davlat rahbari lavozimidan voz kechmasligini e’lon qilganidan keyin Braziliya Oliy saylov sudi tergov ochishga qaror qildi.