Бразилия президенти Жаир Болсонари Россия етакчиси Владимир Путиндан атом сувости кемасини қуриш лойиҳасида иштирок этишни сўради, деб хабар беради Folha de S.Paulo нашри.
Нашр маълумотларига кўра, Болсонару бу каби баёнотни февраль ойида билдирган. Сиёсатчи АҚШ лойиҳани амалга оширишда ёрдам беришдан бош тортгани сабаб шу каби қадамни ташлаган.
«Қўшма Штатлар Бразилия атом сувости кемаси лойиҳасини рад этгани президент Жаир Болсонаруни Владимир Путиндан ёрдам сўраб, мурожаат қилишга ундаган», — дейилади хабарда.
Нашрнинг ёзишича, сувости кемасини яратишдаги муаммолардан бири — атом сувости кемасида ишлатилиши керак бўлган ёнилғини сертификатлаш билан боғлиқ.
Шунингдек, Тоғ-кон саноати ва энергетика вазири, захирадаги адмирал Бенту Албукерке Россиянинг давлат атом энергетика компанияси «Росатовм» билан унинг «Ангра-3» АЭСдаги иштироки тўғрисида гаплашганини тасдиқлаган.
«Ангра» АЭСнинг учинчи энергоблокини қуриш 1984 йилда бошланган, бироқ орадан икки йил ўтиб, лойиҳа тўхтаб қолган. 2008 йилда Бразилия ҳукумати АЭСни қуриш қайта тикланишини маълум қилган.
Аввалроқ Бразилия президенти ҳарбий тўнтариш уюштиришга тайёргарлик кўришда айблангани, Бразилия сенаторлари коронавирус билан боғлиқ вазият сабаб президент Болсонаруга қарши айбловни маъқуллагани тўғрисида хабар берилганди. Болсонару ва ҳукуматнинг бошқа аъзолари коллектив иммунитетга эришиш умидида коронавируснинг аҳоли орасида тарқалишига йўл қўйганликда айбланган эди.
Изоҳ (0)