Ukraina prezidenti ofisi rahbarining o‘rinbosari Kirill Timoshenko 11-mart kuni o‘g‘irlab ketilgan Melitopol meri Ivan Fedorovning asirlikdan ozod qilinganini bildirdi.
Timoshenkoning so‘zlariga ko‘ra Fedorov maxsus operatsiya vaqtida ozod qilingan va hozir xavfsiz joyda. Hukumat vakili maxsus operatsiyaning qolgan tafsilotlari haqida ma’lumot bermagan. Shuningdek, Timoshenko shahar rahbarining qanday o‘g‘irlab ketilganining tafsilotlarini ham oshkor etmagan.
“Bir narsani aytmoqchiman: biz hech qachon o‘zimiznikilarni tashlab qo‘ymaymiz. Ivan tez orada Ukrainaning Melitopol shahri meri lavozimiga qaytib, faoliyatini boshlaydi”, — deya ta’kidlagan Timoshenko.
Melitopol Rossiya Ukrainaga bostirib kirgan dastlabki kunlardan boshlab Moskva qo‘shinlari nazoratiga o‘tgan. Shahar meri Ivan Fedorov 11-martda o‘g‘irlab ketilgan, videoda harbiy kiyimdagi noma’lum shaxslarning uni hokimlik administratsiyasi binosidan olib chiqib ketayotgani aks etgandi. Fedorovni kim o‘g‘irlab ketgani va uning qayerda tutqunlikda saqlangani ma’lum, biroq voqeadan keyin DXR hamda LXR ma’muriyatlari Fedorovni terrorchilikda ayblayotganligini bildirgan.
Fedorov yo‘qolib qolganidan so‘ng Rossiya tomoniga xizmat qiluvchi “Muxolifat bloki” shahar kengashi deputati Galina Danilchenko “yangi davrda” shaharni boshqarish uchun “xalq saylagan guruhlar” tashkil etilganini ma’lum qildi. Shundan keyin Ukraina hukumati ayolga nisbatan davlatga xiyonat ayblovi bilan tergov ishini ochdi.
Avval 15-martda Kiyevda kuchaytirilgan komendantlik soati joriy etilgani, 14-martda Rossiya qo‘shinlari tomonidan egallangan Chernobil AESda elektr ta’minoti qayta tiklangani, shuningdek 12-mart kuni Zelenskiy urush vaqtida 1300 nafar ukrainalik harbiylarning halok bo‘lganini ma’lum qilgani haqida xabarlar berilgan.
Rossiya—Ukraina urushiga oid tezkor, ishonchli yangiliklar va ma’lumotlarni “Daryo”ning Live sahifasi orqali kuzatib boring → @Daryo_Live
Izoh (0)