Soliq tushumlari oshdi, kreditlar hajmi kamaydi. O‘zbekistonda yanvar oyida ishbilarmonlik faoliyati e’lon qilindi

2022-yilning 1-yanvaridan 31-yanvarigacha bo‘lgan davrda respublikada soliq tushumlari hajmi o‘tgan yilning shu davriga nisbatan 24,6 foizga oshgan. Bu haqda “Review.uz” xabar bermoqda.

Shu bilan birga, Qashqadaryo (55,3 foiz), Buxoro (53,5 foiz), Sirdaryo (52,8 foiz) viloyatlari, Qoraqalpog‘iston Respublikasi (45,7 foiz) va Toshkent shahrida (70 foiz) soliq tushumlarining sezilarli o‘sishi qayd etildi.

Yanvar oyida bojxona to‘lovlari bo‘yicha tushumlar 40,6 foizga oshdi. Daromadning eng katta o‘sishi Andijon (2,7 marta), Xorazm (2 marta), Toshkent (71,6 foiz), Buxoro (66,4 foiz) viloyatlari va Toshkent (4 marta) shahrida kuzatildi.

Davlat bojxona qo‘mitasi ma’lumotlariga ko‘ra, yil boshidan buyon tovarlar eksporti hajmi o‘tgan yilning shu davriga nisbatan 18,9 foizga oshgan. Tovarlar eksport hajmining o‘sishi Qashqadaryo (67 foiz), Surxondaryo (65,5 foiz), Samarqand (53,8 foiz), Farg‘ona (46,6 foiz), Namangan (46,1 foiz) va Xorazm (31,0 foiz) viloyatlarida qayd etildi.

O‘zbekiston eksportining o‘sishi sanoat mahsulotlari, oziq-ovqat mahsulotlari, kimyo va qishloq xo‘jaligi mahsulotlari eksportining o‘sish sur’atlari bilan izohlangan.

Joriy yilning 1-yanvaridan 31-yanvarigacha bo‘lgan davrda tijorat banklari tomonidan berilgan kreditlar hajmi o‘tgan yilning shu davriga nisbatan 0,9 foizga kamaydi.

Berilgan kreditlar hajmining o‘sishi faqat Andijon (3,2 barobar), Samarqand (95,8 foiz) va Qoraqalpog‘istonda (6 foiz) kuzatilmoqda. Boshqa barcha hududlarda kreditlar berish o‘tgan yilning shu davriga nisbatan kamaydi.

O‘tgan oyda 7013 ta yangi tadbirkorlik subyektlari tashkil etilib, ularning eng ko‘pi Samarqand (909), Andijon (756), Toshkent (590), Farg‘ona (572) viloyatlarida va Toshkent (1277) shahrida ro‘yxatga olingan.

Yanvar oyida O‘zbekiston Respublika tovar-xomashyo birjasida tuzilgan bitimlar hajmi 47,3 foizga o‘sdi. Savdo faolligining sezilarli o‘sishi Toshkent (89,4 foiz), Namangan (71,4 foiz), Xorazm (45,4 foiz) viloyatlari, Qoraqalpog‘iston (50,5 foiz) va Toshkent (81,7 foiz) shahrida kuzatilmoqda.

Avvalroq O‘zbekistonda jismoniy shaxslarning muammoli kreditlari hajmi yil boshidan buyon 5,4 baravarga oshgani xabar berilgan edi.