The Apollo Hospitals kompaniyasi Marafon Group bilan O‘zbekistonda birinchi uchlamchi tibbiy yordam ko‘rsatish shifoxonasini tashkil etish bo‘yicha shartnoma tuzdi. Bu haqda Money Control xabar bermoqda.
Uchlamchi yordam — yuqori ixtisoslashgan tibbiy yordam. Odatda uzoq vaqt davomida tibbiy mutaxassislar tomonidan amalga oshiriladigan ilg‘or va murakkab muolajalarni o‘z ichiga oladi.
Qayd etilishicha, Apollo Hospitals bilan hamkorlik O‘zbekiston, Qirg‘iziston, Qozog‘iston va Tojikistonning chegaradosh viloyatlarida amalga oshiriladi. Loyiha 60 milliondan ortiq aholiga sifatli tibbiy xizmat ko‘rsatish imkonini berishi kutilmoqda.
“Biz Marafon Group bilan hamkorlikda O‘zbekiston va uning qo‘shni mamlakatlaridagi 60 milliondan ortiq aholiga sifatli tibbiy xizmatdan foydalanish imkoniyatlarini yaxshilash maqsadidamiz. Biz uchlamchi tibbiy xizmat ko‘rsatishdan g‘ururlanamiz”, — deydi kompaniya asoschisi Prathap Reddy.
Marafon Group’ning O‘zbekistonda 10 ga yaqin tibbiy va diagnostika markazlari mavjud.
Farg‘ona viloyatida barpo etiladigan uchlamchi shifoxona birinchi navbatda onkologiya, organlar transplantatsiyasi, urologiya, neyroxirurgiya, kardiologiya va yuqori darajadagi diagnostika yo‘nalishlariga yo‘naltiriladi.
Marafon guruhi asoschilaridan biri Nurillo Mamasodiqovning aytishicha, Apollo kasalxonalari bilan hamkorlik O‘zbekistonda sog‘liqni saqlash tizimini mustahkamlaydi va hayot sifatini oshiradi.
Apollo kasalxonalari Buyuk Britaniya, Mavrikiy, Misr, Barbados, Bangladesh, Vyetnam, Fiji oroli, Bahrayn va Nigeriya kabi 25 mamlakatda mavjud. Yaqin kelajakda Bangladesh, Shri-Lanka, Efiopiya, Keniya, BAA, Saudiya Arabistoni va Samoada bir nechta loyihalar amalga oshirilishi rejalashtirilmoqda.
Izoh (0)