Солиқ тушумлари ошди, кредитлар ҳажми камайди. Ўзбекистонда январь ойида ишбилармонлик фаолияти эълон қилинди

2022 йилнинг 1 январидан 31 январигача бўлган даврда республикада солиқ тушумлари ҳажми ўтган йилнинг шу даврига нисбатан 24,6 фоизга ошган. Бу ҳақда «Review.uz» хабар бермоқда.

Шу билан бирга, Қашқадарё (55,3 фоиз), Бухоро (53,5 фоиз), Сирдарё (52,8 фоиз) вилоятлари, Қорақалпоғистон Республикаси (45,7 фоиз) ва Тошкент шаҳрида (70 фоиз) солиқ тушумларининг сезиларли ўсиши қайд этилди.

Январь ойида божхона тўловлари бўйича тушумлар 40,6 фоизга ошди. Даромаднинг энг катта ўсиши Андижон (2,7 марта), Хоразм (2 марта), Тошкент (71,6 фоиз), Бухоро (66,4 фоиз) вилоятлари ва Тошкент (4 марта) шаҳрида кузатилди.

Давлат божхона қўмитаси маълумотларига кўра, йил бошидан буён товарлар экспорти ҳажми ўтган йилнинг шу даврига нисбатан 18,9 фоизга ошган. Товарлар экспорт ҳажмининг ўсиши Қашқадарё (67 фоиз), Сурхондарё (65,5 фоиз), Самарқанд (53,8 фоиз), Фарғона (46,6 фоиз), Наманган (46,1 фоиз) ва Хоразм (31,0 фоиз) вилоятларида қайд этилди.

Ўзбекистон экспортининг ўсиши саноат маҳсулотлари, озиқ-овқат маҳсулотлари, кимё ва қишлоқ хўжалиги маҳсулотлари экспортининг ўсиш суръатлари билан изоҳланган.

Жорий йилнинг 1 январидан 31 январигача бўлган даврда тижорат банклари томонидан берилган кредитлар ҳажми ўтган йилнинг шу даврига нисбатан 0,9 фоизга камайди.

Берилган кредитлар ҳажмининг ўсиши фақат Андижон (3,2 баробар), Самарқанд (95,8 фоиз) ва Қорақалпоғистонда (6 фоиз) кузатилмоқда. Бошқа барча ҳудудларда кредитлар бериш ўтган йилнинг шу даврига нисбатан камайди.

Ўтган ойда 7013 та янги тадбиркорлик субъектлари ташкил этилиб, уларнинг энг кўпи Самарқанд (909), Андижон (756), Тошкент (590), Фарғона (572) вилоятларида ва Тошкент (1277) шаҳрида рўйхатга олинган.

Январь ойида Ўзбекистон Республика товар-хом ашё биржасида тузилган битимлар ҳажми 47,3 фоизга ўсди. Савдо фаоллигининг сезиларли ўсиши Тошкент (89,4 фоиз), Наманган (71,4 фоиз), Хоразм (45,4 фоиз) вилоятлари, Қорақалпоғистон (50,5 фоиз) ва Тошкент (81,7 фоиз) шаҳрида кузатилмоқда.

Аввалроқ Ўзбекистонда жисмоний шахсларнинг муаммоли кредитлари ҳажми йил бошидан буён 5,4 бараварга ошгани хабар берилган эди.