Turkmaniston prezident Gurbanguli Berdimuhamedov 2-fevral kuni Xitoyning Turkmanistondagi elchixonasi matbuot xizmati xodimi Yuy Syaoshuanga qisqa intervyu berdi. Jurnalist Berdimuhamedovga Xitoyning CCTV, “CGTN in Russian” telekompaniyalari, “Jenmen jibao” gazetasi va “Sinxua” axborot agentligi nomidan savollar bergan.
Berdimuhamedov intervyuda 4-fevral kuni Qishki Olimpiya o‘yinlarining ochilish marosimida ishtirok etishini aytgan. “Bu qaror, birinchi navbatda, ushbu voqeaning butun sayyoramiz uchun katta ahamiyat kasb etishini anglash bilan bog‘liq”, — dedi davlat rahbari.
Bundan tashqari, Berdimuhamedov Turkmaniston Xitoy Xalq Respublikasini mamlakat hududiy yaxlitligi masalalarida qo‘llab-quvvatlashi, “yagona Xitoy” siyosati va mamlakatni tinch yo‘l bilan birlashtirish tarafdori ekanini ta’kidlagan.
“Xitoy” nomiga XXR materigi va Tayvan oroli (Xitoy Respublikasi) tomonidan da’vo qilinadi. XXR Tayvan hukumatini tan olmaydi va “Bir davlat – ikki tizim” tamoyili asosida orol bilan avtonom maqomda birlashishga intiladi. Ayni paytda Tayvanning amaldagi hukumati orol mustaqilligini saqlab qolishni talab qilmoqda.
Bundan tashqari, Berdimuhamedov intervyuda “Bir kamar – bir yo‘l” va “Buyuk ipak yo‘lining tiklanishi” transport loyihalari, shuningdek, Xitoy bilan fan, madaniyat, ta’lim va boshqa sohalardagi hamkorlikning ahamiyati haqida gapirgan, ammo birorta tafsilot bermagan.
2021-yili Gurbanguli Berdimuhamedov xorijiy OAVga uchta intervyu bergan edi. Noyabr oyida Turkiyaning TRT World telekanali bosh muharriri Yusuf Erimga intervyu bergan. Oktabr oyida prezident bilan “TASS” bosh direktorining birinchi o‘rinbosari Mixail Gusman suhbatlashgan. May oyida esa “MIR” davlatlararo teleradiokompaniyasi raisi Radik Batirshin Turkmaniston rahbari bilan suhbatlashgan. 2018-yilda “Rossiya 24” telekanali Turkmaniston rahbari bilan intervyu qilgandi.
Mavzuga doir:
- Berdimuhamedov Turkmanistonni xorijiy davlatlarga yanada tanitish uchun diplomatlarga o‘zi bilan kitob va jurnallar olib ketishni buyurdi
- Baliqchilar Gurbanguli Berdimuhamedovni baliqsho‘rva bilan mehmon qildi va unga bag‘ishlangan qo‘shiqni kuylab berdi (video)
- Gurbanguli Berdimuhamedov munajjimlar bashorati asosida 2022-yil uchun tavsiyalar berdi
Izoh (0)