Buyuk Britaniyada koronavirusga qarshi hisob bo‘yicha beshinchi vaksina — Amerikaning Novavax kompaniyasining Nuvaxovid dori vositasidan foydalanishga ruxsat berildi. Bu haqda Dori vositalari va tibbiyot mahsulotlarini nazorat qilish agentligiga (MHRA) tayanib, “TASS” xabar berdi.
Regulyatorning ta’kidlashicha, dori vositasi “xavfsizlik, sifat va samaradorlikning talab qilinadigan standartlariga muvofiqligi sinchkovlik bilan ko‘rib chiqilganidan so‘ng”, 50 mingga yaqin odam ishtirok etgan ikkita yirik klinik sinov natijalarini tayangan holda tasdiqlangan.
Mazkur vaksina 2021-yilning dekabrida Yevropa dori vositalari agentligi (EMA) va Jahon sog‘liqni saqlash tashkiloti (JSST) tomonidan qo‘llash uchun tavsiya etilgandi. Nuvaxovid JSST tomonidan pandemiya sharoitida qo‘llashga ruxsat berilgan 10-vaksina hisoblanadi. Sinovlar davomida u COVID-19 ga qarshi 90,4 foiz samaradorlikni ko‘rsatgan.
Mazkur dori vositasi Buyuk Britaniyada hozirgi kunda foydalanilayotgan koronavirusga qarshi boshqa vaksinalardan farq qiladi, chunki unda rekombinant oqsilga asoslangan texnologiyadan foydalanilgan bo‘lib, undan uzoq yillardan beri gepatit B kabi boshqa kasalliklarga qarshi vaksinalarni yaratishda foydalanib kelinadi.
Bunga qadar Buyuk Britaniyada to‘rtta turdagi vaksinadan foydalanishga ruxsat berilgandi — AstraZeneca, Pfizer, Moderna va Janssen (Johnson&Johnson bo‘linmasi) kompaniyalarining dori vositalaridan.
Avvalroq Buyuk Britaniya va Norvegiya emlanganlar uchun karantinni bekor qilgani, Braziliyada Pfizer vaksinasi bilan emlangan 10 yoshli bolaning yuragi to‘xtab qolgani, Avstriya Yevroittifoq mamlakatlaridan birinchi bo‘lib majburiy vaksinatsiyani joriy qilishi to‘g‘risida xabar berilgandi.
Izoh (0)