Amerikalik harbiy xizmatchilar 2-fevral kuni kechqurun Suriya shimoli-g‘arbida aksilterrorchilik operatsiyasini o‘tkazdi. Bu haqda Pentagon matbuot kotibi Jon Kirbiga tayanib, Anadolu agentligi xabar berdi.
“AQSh maxsus kuchlari Markaziy qo‘mondonlik nazorati ostida bugun kechasi Suriya shimoli-g‘arbida aksilterrorchilik missiyasini o‘tkazdi. Missiya muvaffaqiyatli yakunlandi”, — deyiladi bayonotda.
Amerika tomonidan hech qanday qurbonlar yo‘qligi va hech kim jarohat olmagani aytilmoqda. Operatsiyaning qolgan tafsilotlari oshkor etilmagan.
Avvalroq AQSh Suriya shimoli-g‘arbida IShID terrorchilik tashkilotining sherigi bo‘lgan shaxsga qarshi maxsus operatsiya o‘tkazishi ma’lum bo‘lgandi. Suriya muxolifatidagi manbalarning so‘zlariga ko‘ra, operatsiya Idlib viloyatida AQSh Harbiy havo kuchlarining F-16 qiruvchi samolyotlari va vertolyotlaridan foydalanilgan holda tashkil etilgan.
AQSh Idlibda bu kabi operatsiyani 2019-yilning oktabrida ham o‘tkazgan va natijada IShID rahbari Abu Bakr al-Bag‘dodiy yo‘q qilingan edi.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)