Rossiya prezidenti Vladimir Putin 3-fevral kuni kechasi Fransiya prezidenti Emmanuel Makron bilan telefon orqali muloqot qildi. Bu haqda Kreml matbuot xizmati xabar berdi.
“Ukraina atrofidagi vaziyat va Rossiyaning xavfsizligi uchun uzoq muddatli huquqiy kafolatlarni ishlab chiqish bo‘yicha Rossiya tashabbusi bilan bog‘liq masalalar yuzasidan muloqot davom etdi”, — deyiladi xabarda.
Kremldagilarning ta’kidlashicha, Vladimir Putin suhbat davomida “yana Kiyev rahbariyatining provakatsion bayonotlari va harakatlariga e’tiborni qaratgan”.
Yelisey saroyi hozircha Putin va Makron o‘rtasida bo‘lib o‘tgan muloqotga izoh bermagan.
Rossiya va Fransiya prezidentlari bir hafta ichida uchinchi bor telefon orqali muloqot qilmoqda. Bundan oldingi suhbatlar 28 va 31-yanvar kunlari bo‘lib o‘tgandi. Ikkala holatda ham Putin va Makron Ukraina atrofidagi vaziyat va Rossiyaning xavfsizlik kafolatlari bo‘yicha takliflarini muhokama qilgan.
2021-yilning dekabrida Rossiya Ukraina chegarasida o‘z qo‘shinlarini to‘playotgani fonida AQSh va NATOga Yevropada o‘zaro xavfsizlik kafolatlarini muhokama qilgandi. Moskva NATOdan o‘z tarkibiga yangi a’zolarni, birinchi navbatda, Ukrainani qo‘shmaslikni, shuningdek, qo‘shinlarini alyansga 1997-yildan keyin qo‘shilgan mamlakatlar hududiga joylashtirmaslikni talab qilgan.
27-yanvar kuni NATO Rossiyaning xavfsizlik kafolatlari bo‘yicha takliflariga yozma ravishda javob qaytardi. Unda ta’kidlanishicha, alyans ochiq eshiklar siyosati va suveren mamlakatlarning NATOga kirish huquqini o‘zgartirish bo‘yicha murosaga tayyor emas.
Avvalroq Buyuk Britaniya bosh vaziri Boris Jonson Kiyevga tashrif buyurib, Ukraina prezidenti Vladimir Zelenskiy bilan muzokaralar o‘tkazgandi. Jonson “rossiyalik askarning oyog‘i Ukraina chegarasini kesib o‘tgan daqiqada” Britaniya Rossiyaga qarshi sanksiyalar qo‘llashiga va’da bergan.
Izoh (0)