Buenos-Ayres yaqinida kokaindan zaharlanish oqibatida kamida 20 kishi vafot etdi va 74 kishi shifoxonaga joylashtirildi, deb xabar beradi Todo Noticias telekanali.
Ma’lum qilinishicha, shifoxonaga yotqizilgan fuqarolarning 18 nafari o‘pkani sun’iy nafas oldirish apparatiga ulangan. Rasmiylarning ogohlantirishicha, qurbonlar soni ortishi mumkin.
Buenos-Ayres provinsiyasi Sog‘liqni saqlash vazirligi so‘nggi 24 soat ichida kokaindan zaharlanish holatlari qayd etilgan munitsipalitetlarning tibbiyot muassasalariga qo‘llanmalar bilan ogohlantirish bergan. Idora bayonotida ta’kidlanishicha, shifoxonalarga og‘ir ahvoldagi fuqarolarning olib kelinishi davom etmoqda.
Dastlabki ma’lumotlarga ko‘ra, zaharlanganlarning barchasi taxminan bitta joydan giyohvand moddalarni xarid qilgan. Provinsiya xavfsizlik vaziri Serxio Berni kokain boshqa modda bilan suyultirilgan bo‘lishi mumkinligini va natijada aralashma yanada zaharliga aylanganini ma’lum qilgan. Berni “so‘nggi 24 soat ichida giyohvand moddalarni xarid qilganlarni ularni tashlab yuborishga” chaqirgan. Prokuratura kokainga qasddan zahar qo‘shilgani haqidagi versiyani ko‘rib chiqmoqda. Huquq-tartibot idoralarining fikricha, gap giyohvand moddalar bilan savdo qiluvchi ikki to‘daning qarama-qarshiligi haqida ketmoqda.
Bundan avval Meksika sohillari yaqinida 1,6 tonna kokain olib ketayotgan qayiqlar qo‘lga olingani, Kolumbiyada qiymati 300 million dollardan ortiq bo‘lgan 10 tonna kokain musodara qilingani to‘g‘risida xabar berilgandi.
Izoh (0)