Turkiyada Gaziantep viloyati janubida kuchli qor bo‘ronlari transportlar qatnovini to‘xtatib qo‘ydi. Bu haqda Milliyet xabar bergan.
Xabarga ko‘ra, hududda oxirgi 54 yil ichida eng kuchli qor bo‘ronlari kuzatilgan. Bir sutka davomida yog‘gan qor hajmi 0,5 dan 1 metrgacha yetgan.
Qor bo‘ronlari avtomobil yo‘llari va xalqaro trassalarni bloklab qo‘ydi. Yo‘llarda yuzlab yuk tashuvchi mashinalar to‘xtab qolgan. Haydovchilar bir sutkadan ortiqroq vaqt davomida sirpanchiq yo‘llarda harakatlana olmagan.
Viloyatga tog‘li hududlardagi aholini evakuatsiya qilishi uchun ikkita harbiy vertolyot yuborilgan. 900 dan ziyod maxsus transport vositalari va texnika trassani qordan tozalash va aholini xavfsiz joyga ko‘chirish ishlariga band qilingan.
3 mingdan ziyod aholi evakuatsiya qilingan. Sirpanchiq va muzlamalardan 2 mingga yaqin avtomobil chiqarib olingan.
Avval Madagaskarda suv toshqinlari tufayli 10 kishi halok bo‘lgani, Rossiyaning Saxalin viloyatidagi qor sikloni sovuq shamollar va bo‘ron olib kelgani, Pokistonda kuchli qor yog‘ishi oqibatida 20 nafardan ziyod odam halok bo‘lgani haqida xabarlar berilgan.
Izoh (0)