AQShning BMTdagi doimiy vakolatxonasi Shimoliy Koreya tomonidan ballistik raketalarning uchirilishi masalasi bo‘yicha BMT Xavfsizlik kengashi yig‘ilishini o‘tkazish tashabbusi bilan chiqdi. Bu haqda tashkilotdagi diplomatlarga tayanib, “Interfaks” xabar berdi.
Manbalarning ma’lum qilishicha, yig‘ilish 19-yanvar kuni yopiq eshiklar ortida bo‘lib o‘tishi mumkin.
AQShning mazkur tashabbusini Albaniya, Buyuk Britaniya, Fransiya, Irlandiya va Meksika qo‘llab-quvvatlagan.
Avvalroq AQShning BMTdagi doimiy vakili Linda Tomas-Grinfild The Washington Post’ga bergan intervyusida Vashington “Shimoliy koreyaliklarga bosim o‘tkazishni davom ettirish” niyatida ekanini ma’lum qilgandi. Albaniya, Buyuk Britaniya, Fransiya, Irlandiya, Yaponiya va Qo‘shma Shtatlar qo‘shma bayonot bilan Pxenyanni “vaziyatni beqarorlashtiruvchi harakatlardan tiyilishga” chaqirganidan so‘ng, Shimoliy Koreya 18-yanvar kuni yana bitta raketani uchirgan edi.
Yanvar o‘rtalarida Shimoliy Koreya AQSh Pxenyanga nisbatan yangi sanksiyalarni joriy etgach, “yanada kuchli va aniq javob” qaytarishga majbur bo‘lishi haqida ogohlantirgandi. “Agarda AQSh shu kabi kontrfrontal pozitsiyani egallashda davom etsa, KXDR bunga yanada kuchli va aniq javob qaytarishga majbur bo‘ladi”, — deyiladi Shimoliy Koreya TIV vakilining bayonotida.
Eslatib o‘tamiz, Shimoliy Koreya 2022-yildagi birinchi raketasini 5-yanvar kuni, ikkinchisini — 11-yanvarda va uchinchisini 14-yanvarda uchirgan edi.
Izoh (0)