Buyuk Britaniya bosh vaziri Boris Jonson Angliyada omikron shtammi tarqalgani tufayli joriy qilingan cheklovlar 26-yanvardan boshlab bekor bo‘lishini ma’lum qildi, deya xabar bergan BBC News.
Jonson quyi Palatada nutq so‘zlab ekspertlar fikricha koronavirusning tarqalish to‘lqini milliy darajada eng yuqori cho‘qqiga chiqqanini ta’kidladi.
26-yanvardan boshlab Angliyada jamoat joylarida tibbiy niqob taqib yurish tartibi bekor qilinadi va bu ortiq majburiyat emas, balki tavsiyaga aylanadi. Shuningdek, tunggi klublar, konsertlar va boshqa ommaviy tadbirlarda qatnashish uchun COVID-pasportlarni ko‘rsatish talabi ham bekor qilinadi. Angliya hukumati alohida tadbirlarning tashkilotchilariga COVID-pasport talabi asosida tomoshabinlarni kiritish yoki kiritmaslik mas’uliyatini topshirgan.
Boris Jonson hukumatning aholiga uydan ishlashni ortiq tavsiya etmasligi, shu sababli ham xodimlar ish beruvchilar bilan ofisga qaytib ishlashni muhokama qilib olishi lozimligini qayd etgan. Bundan tashqari 20-yanvardan boshlab yuqori sinf o‘quvchilari maktablarda tibbiy niqob taqishga majbur bo‘lmaydi.
Bosh vazir hukumatning COVID-19 aniqlangan odamlarning o‘zni yakkalash tartibiga o‘tkazish talabi ham olib tashlanishini qo‘shimcha qilgan. Uning so‘zlariga ko‘ra hozircha mazkur talab o‘z kuchida qoladi, biroq COVID-19 tarqalishiga qarab u ham tavsiya xarakteriga ega bo‘ladi. Mazkur qoidalarning muddati 24-martda yakuniga yetadi.
The Guardian’ning yozishicha Boris Jonson koronavirus cheklovlarining ko‘pchiligi bosh vazirning lokdaun vaqtida Londonda Dauning-stritda joylashgan rezidensiyada o‘tgan bazmdagi ishtiroki haqidagi xabarlar tufayli norozi bo‘lgan parlament a’zolarini tinchlantirish uchun bekor bo‘lmoqda.
Avvalroq quyi palata 2020-yil mayda lokdaun vaqtida rezidensiya bog‘ida o‘tkazilgan bazmni muhokama qilgan. Unda qatnashgan Boris Jonson parlamentariylarga buni ishchi tadbir deb o‘ylagani haqidagi vajni aytgandi. U koronaviurs qoidalarini buzgani uchun uzr so‘ragan.
2021-yil dekabrda Buyuk Britaniyada Boris Jonson devonxonasi xodimlarining 2020-yil dekabrda lokdaun vaqtida Dauning-stritdagi rezidensiyada o‘tgan rojdestvo bazmida qatnashgani va bir-birlari bilan hazil qilayotgani aks etgan shovshuvli video tarqaldi. Jonson mazkur video uchun ham kechirim so‘ragan. Ushbu videoyozuvdagi bosh vazir apparatining xodimasi ishdan bo‘shagan.
Izoh (0)