Turkiya prezidenti Rajab Toyyib Erdo‘g‘on Rossiya va Ukraina prezidentlari Vladimir Putin va Vladimir Zelenskiyni “ixtiloflarni bartaraf etish uchun” Turkiyaga taklif qildi. Bu haqda Erdo‘g‘onning rasmiy vakili Ibrohim Kalinga tayanib, Daily Sabah xabar berdi.
Kalin Circle fondi tomonidan tashkillashtirilgan “Rossiya va Ukraina o‘rtasidagi taranglik: Yevropa va NATO uchun qanday xavf bor?” nomli onlayn vebinarda nutq so‘zlagan.
“Turkiya Rossiya va Ukraina o‘rtasidagi taranglikni kamaytirish uchun har qanday harakatga tayyor”, — dedi Kalin.
Unga ko‘ra, Erdo‘g‘on Putin bilan ham, Zelenskiy bilan ham gaplashdi. “U hatto ikki yetakchini agar yuzma-yuz uchrashib, muammolar va kelishmovchiliklarini hal qilmoqchi bo‘lsa, Turkiyaga kelishni taklif qildi”, — dedi Erdo‘g‘onning matbuot kotibi. U, shuningdek, Erdo‘g‘on yaqin bir necha hafta ichida Zelenskiy bilan muzokaralar o‘tkazish uchun Ukrainaga borishini ma’lum qildi.
“Turkiya buni nafaqat Rossiya va Ukrainaga do‘st davlat sifatida, balki NATO ittifoqchisi sifatida ham amalga oshiradi”, — ta’kidladi Kalin.
“TASS” xabariga ko‘ra, Kreml taklifni rad etgan. Rossiya prezidentining matbuot kotibi Dmitriy Peskov Erdo‘g‘onning taklifiga shunday fikr bildirgan:
“Ukrainadagi vaziyatni tartibga solishga yordam bera oladigan har qanday davlatning sa’y-harakatlarini shubhasiz qo‘llab-quvvatlaymiz. Rossiya va Ukraina o‘rtasidagi asosiy kelishmovchiliklar aynan Kiyevning Minsk kelishuvlarini bajarishni to‘xtatib qo‘ygani bilan bog‘liq. Agar turkiyalik hamkorlarimiz ukrainaliklarga ta’sir o‘tkaza olsa, ularni avvalroq tuzilgan kelishuv va majburiyatlarni bajarishga undasa, buni faqat olqishlash mumkin”, — dedi u.
“Ayrim muloqotlarning qayerda o‘tkazilishi — ikkinchi darajali. Asosiysi — yakunda Ukrainaga ta’sir o‘tkazish”, — deya qo‘shimcha qildi Peskov.
Bu Erdo‘g‘onning Rossiya va Ukraina munosabatlarida vositachilik qilish haqidagi birinchi taklifi emas. 2021-yilning noyabrida u Turkiya Rossiya va Ukraina o‘rtasidagi ziddiyatni yumshatishda vositachi bo‘lishga tayyorligini ma’lum qilgandi. Shundan so‘ng Erdo‘g‘on Turkiya inqirozni Putin bilan muhokama qilayotganini va ziddiyatning har ikki tomoni bilan muzokaralarni davom ettirish niyatida ekanini ta’kidlagan.Avval ham Peskov Donbass bo‘yicha Rossiya, Ukraina va Turkiya yetakchilari ishtirokida sammit o‘tkazish mantiqqa to‘g‘ri kelmasligini, chunki Moskva ziddiyat tarafi emasligini aytgan. Peskovning so‘zlariga ko‘ra, qarama-qarshi tomonlar Kiyev va o‘zini respublika e’lon qilgan Donetsk va Lugansk xalq respublikalari vakillaridir.
Izoh (0)