Туркияда Газиантеп вилояти жанубида кучли қор бўронлари транспортлар қатновини тўхтатиб қўйди. Бу ҳақда Milliyet хабар берган.
Хабарга кўра, ҳудудда охирги 54 йил ичида энг кучли қор бўронлари кузатилган. Бир сутка давомида ёғган қор ҳажми 0,5 дан 1 метргача етган.
Қор бўронлари автомобиль йўллари ва халқаро трассаларни блоклаб қўйди. Йўлларда юзлаб юк ташувчи машиналар тўхтаб қолган. Ҳайдовчилар бир суткадан ортиқроқ вақт давомида сирпанчиқ йўлларда ҳаракатлана олмаган.
Вилоятга тоғли ҳудудлардаги аҳолини эвакуация қилиши учун иккита ҳарбий вертолёт юборилган. 900 дан зиёд махсус транспорт воситалари ва техника трассани қордан тозалаш ва аҳолини хавфсиз жойга кўчириш ишларига банд қилинган.
3 мингдан зиёд аҳоли эвакуация қилинган. Сирпанчиқ ва музламалардан 2 мингга яқин автомобиль чиқариб олинган.
Аввал Мадагаскарда сув тошқинлари туфайли 10 киши ҳалок бўлгани, Россиянинг Сахалин вилоятидаги қор циклони совуқ шамоллар ва бўрон олиб келгани, Покистонда кучли қор ёғиши оқибатида 20 нафардан зиёд одам ҳалок бўлгани ҳақида хабарлар берилган.
Изоҳ (0)