Inson huquqlari bo‘yicha Yevropa sudi (IHYeS) Armaniston bosh vaziri Nikol Pashinyan ishi bo‘yicha qaror chiqardi. U 2008-yili Yerevanda bo‘lib o‘tgan namoyishlardan keyingi jinoiy ta’qib sabab IHYeSga murojaat qilgandi, deb xabar beradi “RBK”.
2008-yilning fevralida Armanistonning uchinchi prezidenti uchun saylovlar bo‘lib o‘tgan. Unda Serj Sargsyan g‘olib chiqqan. Uning asosiy raqibi bo‘lgan birinchi prezident Levon Te-Petrosyanning tarafdorlari ovoz berish yakunlari e’lon qilingach, norozilik namoyishini uyushtirgan. Pashinyan unda faol ishtirok etgan. Namoyishchilarning politsiya bilan to‘qnashuvlari oqibatida 10 kishi halok bo‘lgan, 200 ga yaqin odam jarohat olgan. Namoyishlardan keyin Pashinyanga nisbatan qidiruv e’lon qilingan va u bir yildan ortiq vaqt davomida huquq-tartibot organlaridan yashirinib yurgan. 2009-yilda u hukumatga taslim bo‘lgan va hibsga olingan, 2010-yilda esa ommaviy tartibsizliklarni tashkillashtirgani uchun yetti yilga ozodlikdan mahrum etilgan.
Bo‘lajak bosh vazir 2011-yilning mayida, respublika mustaqilligining 20 yilligi munosabati bilan e’lon qilingan amnistiya sabab ozodlikka chiqqan.
IHYeS Pashinyanga nisbatan chiqarilgan hukm Inson huquqlari bo‘yicha Yevropa konvensiyasining 5 va 11-moddalarini – shaxs erkinligi va shaxsiy daxlsizligi hamda tinch yig‘inlar o‘tkazish huquqini buzgan deb topgan. “Tinch ishtirokchilar (norozilik namoyishlari — tahr.) boshqalar tomonidan sodir etilgan qoralangan harakatlar uchun javobgarlikka tortilmasligi kerak”, — deyiladi sud qarorida.
Pashinyan moddiy kompensatsiya talab qilmagan, shu sababli sud uni belgilamagan.
2008-yilda Pashinyan Haykakan Zhamanak (Armenian Times) gazetasining bosh muharriri bo‘lgan. qamoqdan chiqqach u Armaniston milliy kongressi nomidan parlamentga saylangan, 2017-yilda esa qayta saylangan va shu yilning o‘zida Yerevan meri uchun saylovlarda ishtirok etib, Taron Margaryanga yutqazib qo‘ygan.
Pashinyan Armanistonda 2018-yilda sodir bo‘lgan “baxmal inqilobi” yetakchilaridan biri. O‘shanda namoyishchilar Sargsyanning bosh vazirlikdan ketishini talab qilgan. Namoyishlar vaqtida 22-aprel kuni Pashinyan va 270 dan ortiq odam ushlangan, biroq ertasi kuni qo‘yib yuborilgan. 8-may kuni Pashinyan yangi hukumat rahbari etib saylangan.
Shundan so‘ng Pashinyan ikki marta — 2018-yilning oktabri va 2021-yilning aprelida parlamentni tarqatib yuborish va muddatidan oldin parlament saylovlarini o‘tkazish uchun iste’foga chiqdi. Ikkala holatda ham u qayta saylangan.
Izoh (0)