Kaliforniya shtati prokurorlari Tesla Model S egasiga nisbatan 2019-yilda o‘lim bilan yakunlangan avariya sabab ayblov e’lon qildi, deb xabar beradi Associated Press. Ta’kidlanishicha, mazkur YTHlar vaqtida elektrokarda avtopilot tizimi ham ishlayotgan bo‘lgan.
Okrug prokurorining ma’lumotlariga ko‘ra, ko‘ngilsiz hodisa Los-Anjeles yaqinida sodir bo‘lgan. Katta yo‘lda harakatlanayotgan 27 yoshli erkak svetoforning qizil chirog‘ida o‘tib ketib, Honda Civic’ga urilgan va oqibatda ikki kishi halok bo‘lgan. Mashina egasi o‘lim bilan yakunlangan yo‘l-transport hodisasi ishi bo‘yicha ayblanmoqda. Sud jarayoniga qadar u garov evaziga ozod qilingan, hozircha ish ko‘rib chiqilmoqda.
Sudning rasmiy hujjatlarida elektrokarning avtopiloti funksiyasi qayd etilmagan. Shu bilan birga, avariyani tergov qilish bo‘yicha jamoa shakllantirgan AQSh Yo‘l harakati xavfsizligi milliy administratsiyasi (NHTSA) YTH vaqtida avtopilot faol holatda bo‘lganini tasdiqlagan. Yaqin kelajakda idora surishtiruv natijalarini e’lon qilishni rejalashtirmoqda.
“NHTSA hozirgi kunda sotuvda bo‘lgan birorta transport vositasi to‘liq ‘mustaqil boshqarilish’ huquqiga ega emasligini eslatib o‘tadi. Avtopilot faol yoki faol emasligidan qat’iy nazar, haydovchi yo‘ldagi vaziyatni nazorat qilish va unga qarab ketishga majbur. Shtat qonunlariga ko‘ra, shuningdek, u avtomatlashtirilgan tizimlar yordamida boshqarilgan holatlarning oqibati uchun ham javob beradi”, — deyiladi NHTSA bayonotida.
Mavzuga doir:
Shuningdek, Shimoliy Karolina shtatida avtopilotda harakatlanayotgan Tesla Model S ikkita politsiya avtomobili bilan to‘qnashuv sodir etgani hamda Tesla Model 3 ning ruli harakat vaqtida uzilib tushgani, Xitoyda Tesla avtopiloti soatiga 127 kilometr tezlikda harakatlanib, YTHga uchragani to‘g‘risida xabar berilgandi.
Izoh (0)