Yangi yil bayrami munosabati bilan “Yangi O‘zbekiston” bog‘iga tashrif buyuruvchilarga qulaylik yaratish maqsadida “Do‘stlik” metro bekatidan bog‘ga qadar bepul qatnovchi avtobuslar yo‘lga qo‘yildi. Bu haqda “Toshshahartransxizmat” matbuot xizmati xabar berdi.
O‘zbekistonning eng baland sanalgan bosh Yangi yil archasi “Yangi O‘zbekiston” bog‘ida o‘rnatilishi to‘g‘risida xabar berilgandi. Shu munosabat bilan “Yangi O‘zbekiston” bog‘iga tashrif buyuruvchi fuqarolar va poytaxt mehmonlariga sifatli hamda qulay transport xizmatini ko‘rsatish maqsadida 20-dekabrdan 2022-yilning 10-yanvar kuniga qadar “Do‘stlik” metrosi—“Yangi O‘zbekiston bog‘i” yo‘nalishida harakatlanuvchi maxsus bepul avtobuslar ishga tushirilgan.
Ushbu avtobus yo‘nalishi soat 08:00 dan 22:00 ga qadar harakatlanadi. Avtobusning harakat jadvallari soni — 6 ta, harakatlanish vaqti esa 10-11 daqiqa oralig‘ini tashkil etadi.
Eslatib o‘tamiz, “Yangi O‘zbekiston” bog‘i 31-avgust kuni ochilgan. O‘zbekiston mustaqilligining 30 yilligiga bag‘ishlangan bayram mushakbozligi ham shu bog‘da o‘tkazilgandi. Biroq bog‘ga olib boruvchi yo‘lda transport harakati 3 kunga — 31-avgustdan 2-sentabrgacha cheklangani sababli uni yaqindan ko‘rishning imkoni bo‘lmagandi.
Izoh (0)